Profisionál saúde prepara vasina AstraZeneca, iha sentru saúde, kuarta (21/07/21). Imajen Tatoli/António Gonçalves.

VIQUEQUE, 29 jullu 2021 (TATOLI)—Rezuldatu teste swab hosi Sentru Integradu Jestaun Krize (SIJK), fó-sai iha kinta 28 jullu hatudu katak, kazu pozitivu COVID-19 hosi munisípiu Viqueque na’in 21.

Diretór Sebvisu Saúde munisípiu Viqueque, Francisco de Carvalho, hateten kazu pozitivu hosi munisípiu ne’e aumenta tanba populasaun la koopera ho parte saúde hodi halo teste swab.

Notísia relevante:COVID-19, rekoperadu 29 no ativu 867

“Ita deskonfia pasiente detetadu-sira mak halo kontaktu rasik ho família, maibé la hatudu-an ba pesoál saúde-sira. Tanba ne’e iha 28 jullu ekipa saúde halo teste masal ba populasaun na’in 50-resin hosi suku Umaquic, postu administrativu Viqueque Villa,” Francisco de Carvalho hateten ba jornalista Agência Tatoli, kinta ne’e.

Diretór ne’e husu, populasaun ne’ebé kontaktu besik ba pasiente pozitivu karik, favór hatudu-an ba parte saúde hodi halo teste swab atu labele da’et moras ba ema seluk.

Iha fatin seluk, Prezidente SIJK munisípiu Viqueque, atuál adiministradór munisípiu, Januário Soares ‘Bolly’, haktuir, kazu pozitivu kontinua aumenta makás, nune’e populasaun tenke koopera ho parte saúde bainhira halo kontaktu ho pasiente pozitivu-sira.

Dadus SIJK iha ohin hatudu katak, munisípiu Viqueque rejista kazu pozitivu foun na’in 21, rekopradu na’in-ida, kazu ativu hamutuk na’in 55.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here