Konstrusaun “Memoriál 7 Dezembru 1974” iha Ponte Kais Dili. Imajen TATOLI/Osória Marques.

DILI, 29 jullu 2021 (TATOLI)-Centro Nacional Chega! Institutu Públiku, (CNC! I.P)  servisu hamutuk ho Ministériu Turizmu Komérsiu no Indústria (MTCI-sigla portugés) sei  halo reabilitasaun ba sítiu istóriku haat iha Dili.

Sítiu istóriku hirak-ne’e maka hanesan Casa Eropa, Kámara Ekleziástika Dioseze Dili iha Colmera, Santai Ho ho Uma Adat Tasi-Tolu.

Diretór Ezekutivu Interinu Centro Nacional Chega, Metodio Caetano Moniz hateten, CNC servisu hamutuk ho MTCI halo reabilitasaun ba sítiu istóriku sira tanba CNC nu’udar institutu públiku ne’ebé estabelese ho dekretu lei númeru 48/2016 ho nia servisu mak halo prezervasaun ba memória pasadu inklui sítiu istóriku sira iha Timor-Leste.

Ba Agência Tatoli, kuarta (28/07), iha nia servisu fatin, Balide, Dili, Metodio Caetano Moniz, fundamenta katak CNC mós iha hanoin halo reabilitasaun ba sítiu istoriku sira seluk, maibé  iha tinan oin, maka hanesan, Ponte Cais Dili, Monumentu 7 Dezembru 1975, Pusat Budaya Indonézia (Eis fatin Detensaun Prizioneiru),  Semitériu Santa Cruz, Monumentu Marabia, Palásiu Nobre Lahane ho Komarka Balide.

Iha fatin hanesan Diretór Jerál MTCI, Jelino Soares hateten nia parte konkorda no apresia ba esplikasaun hosi ekipa Centro Chega! nian kona-ba servisu hamutuk atu halo reabilitasaun ba sítiu istóriku sira, no MTCI  komprometidu katak, parte MTCI prontu responsavel ba reabilitasaun fíziku sítiu istóriku haat ne’ebé sei hala’o iha tinan ida ne’e.

Nia espera katak ba iha futuru CNC ho MTCI bele servisu hamutuk di’ak liu tan atu bele haree sítiu istóriku sira iha territóriu Timor-Leste hodi dezenvolve sai fatin di’ak iha Timor-Leste.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here