Distribuiaaun cesta bázika ba reklamante sira iha sub-rejion Passabe. Imajen/Mídia RAEOA-ZEESM.

OÉ-CUSSE, 29 jullu 2021 (TATOLI)-Autoridade Rejiaun Administrativa Espesiál Oé-Cusse Ambenu (RAEOA), halo ona pagamentu ba kompañia 21 ne’ebé durante ne’e fornese produtu lokál ba programa cesta bázika iha Oé-Cusse hamutuk millaun $2-resin.

“Programa cesta bázika iha Oé-Cusse daudaun ne’e autoridade halo ona pagamentu ba kompañia hamutuk 21 ho nia montante orsamentu hamutuk $2.753.481.60, foti hosi orsamentu ba cesta bázika ne’ebé Governu sentrál aloka mai RAEOA hamutuk millaun $4.589.701”, Sekretária Rejionál Asuntu Finansas, Maria Eliza Maniquin, ba Tatoli iha nia servisu fatin Oébau suku Costa sub-rejiaun Pante Makasar, kinta ne’e.

Nia dehan, inisiu kompañia hamutuk 23 mak halo distribuisaun cesta bázika iha Oé-Cusse, nune’e autoridade selu ona kompañia 21 falta empreza rua mak seidauk halo pagamanetu ho sira nia orsamentu ba pagamentu hamutuk rihun $610. 864 tanba sei kompleta sira-nia dokumentu balun.

“Ita nia saldo disponivél osan restu sei iha hela, no osan ne’e sei uza ba distribuisaun reklamante cesta bázika sira, tanba autoridade aloka ona osan, nune’e tempu badak sei distribui-tan apoia ai-han ba sira ne’ebé seidauk simu”, nia haktuir.

Entretantu antes ne’e koordenadór cesta bázika RAEOA, Maximiano Neno, anúnsiu lista ne’ebé Governu aprova benefisiáriu simu cesta bázika hamutuk rihun 85 no daudaun ne’e atinje ona pursentu 100. Nune’e iha reklamante fora hosi lista ne’ebé aprova hosi Governu hamutuk 1.890 mak seidauk simu apoiu neseidade bázika hosi sub-rejiaun Oésilo, Nitibe no Pante Makasar. Enkuantu iha sub-rejiaun Pasabe reklamante 601 simu ona iha semana kotuk.

“Pedidu ba reklamante sira ne’e hetan ona aprovasaun hosi Prezidente Autoridade, nune’e iha tempu badak ita sei rezolve sira”, nia dehan.

Jornalista       : Abilio Elo Nini

Editór             : Cancio Ximenes

HAKEREK NO HATÁN

Please enter your comment!
Please enter your name here