Autoridade RAEOA entrega karreta lima (5) ba Sentru Saúde sira iha Sub-Rejiaun. Imajen Tatoli/Abilio Elo Nini.

OÉ-CUSSE, 29 Jullu 2021 (TATOLI)—Autoridade Rejiaun Administrativa Espesiál Oé-Cusse Ambeno (RAEOA), kinta ne’e entrega karreta lima (5) ne’ebé kompostu hosi karreta haat (4) ba Sentru Saúde sira iha Sub-Rejiaun (4) no karreta ida (1) ba serbisu saúde rejionál.

Autoridade RAEOA, Arsénio Paixão Bano, entrega karreta lima (5) ba Sentru Saúde sira iha Sub-Rejiaun. Imajen Tatoli/Abilio Elo Nini.

“Karreta lima (5) ne’e tenke kontribui halo diferénsa iha serbisu saúde sub-rejionál sira iha área rurál tanba tinan ne’e Oé-Cusse halo investimentu barak mak kuarentena foun neen (6) foin inaugura iha sub-rejionál haat (4) sei sai sentru no postu saúde iha futuru. Tanba ne’e mak ita hahú prepara fasilidade hanesan transporte, rekursu humanu atu apoia asisténsia serbisu saúde ba família sira iha baze,” Prezidente Autoridade RAEOA, Arsénio Paixão Bano, iha serimónia entrega karreta iha Pante Makasar, kinta ne’e.

Nia dehan, persiza hasa’e kobertura iha baze tenke haree ba indikadór ne’ebé Ministériu Saúde fó mai Oé-Cusse nune’e bele hatun persentajen mortalidade iha RAEOA.

Nia husu dirijente sira hotu iha serbisu saúde rejionál, sentru saúde no postu saúde sira uza didi’ak karreta hirak-ne’e, tanba susar tebes atu hetan karreta hanesan ne’e iha fatin barak.

Purtantu, Sekretáriu Rejionál ba Asuntu Saúde, Manuel da Costa, agradese ba autoridade tanba ho apoia transporte hirak-ne’e bele fasilita servisu ba melloramentu hadi’a kondisaun populasaun nian iha baze.

“Karreta lima (5) ne’e ami sente importante tebes tanba kobertura menus, komunidade sira enfrenta hela problema bainhira transfere mai ospitál referénsia, nune’e bele fasilita servisu saúde ba familia no klínika movel, monitorizasaun ba xefe sentru saúde sira ba postu saúde sira,” nia agradese.

Jornalista : Abilio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here