To'os ba Moris Diak (TOMAK) hamutuk ho parseiru UN Women, diskute programa 'Sidade no Merkadu seguru' ho autoridade munisipál Bobonaro no entidade relevante iha salaun administrasaun munisipál Bobonaro, kuarta (28/07). Imajen Tatoli/Sérgio da Cruz.

BOBONARO, 28 jullu 2021 (TATOLI)—Bazeia ba rezultadu avaliasaun merkadu sensível ba jéneru ne’ebé parseiru dezenbolvimentu To’os ba Moris Diak (TOMAK) no United Nations (UN) Women, halo iha 2018 identifika negosiante feto iha merkadu Baucau no Bobonaro 75-85%.

Espesialista ba jéneru TOMAK, Cecilia Fonseca, hato’o asuntu ne’e durante aprezentasaun programa ‘Sidade saudável no merkadu saudável’, ba liña ministerial iha salaun administrasaun Munisipál Bobonaro, kuarta ne’e.

Notísia relevante:Janeiru-juñu, DMCSRN Bobonaro rekolla $2.150

“Peskiza ne’e ami halo iha fatin haat mak hanesan merkadu Maliana, Atabae, Baucau Villa no Benilale, ne’ebé maoria feto mak barak liu,” nia esplika.

Objetivu hosi peskiza ne’e atu haree no identifika vendedór-sira nia nesesidde prioridade, hodi hadi’ak merkadu no fahe informasaun ne’e ba autoridade relevante.

Alende ne’e, parseiru dezenvolvimentu TOMAK ho UN Women mós halo estudu identifikasaun ba feto joven, LGBTI, feto vulnerável no ema ho defisiénsia ne’ebé sente ladún seguru asesu fatin públiku iha Dili hanesan merkadu no estasionamentu.

“Rezultadu avaliasaun ne’e ita halo, iha ne’ebá laiha fasilidade apropriadu, ezemplu laiha sintina, Bee moos, protesaun no seguransa, dalaruma ba feto vulnerável sira ne’e sempre mosu intimidasaun ba presu transporte públiku la justu, fatór hirak-ne’e mak kontribui makás ba problema ne’ebé sira hasoru,” nia hatutan.

Relasiona ho problema ne’e, TOMAK no UN Women implemnta ona Grupu traballu tékniku, iha Munisipiu Baucau, ne’ebé lidera hosi Prezidente Autoridade munisipál Baucau, involve hosi instituisaun relevante no Ogranizasaun Naun Governamentál-sira, asosiasaun vendedór munisipiu Baucau, tau hamutuk opinaun no konsege redúz problema ne’e.

TOMAK mós kapasita ona formasaun no estabele asosiasaun vendedór-sira atu suporta no hasa’e koñesimentu, finansiál, lideransa ba vendedór iha munisípiu Baucau.

“Iha Baucau hotu ona, agora ami mai fali iha Bobonaro liuliu iha merkadu no fatin públiku ne’ebé barak seidauk seguru,” nia subliña.

Parseiru internasionál TOMAK no UN Women iha 2017 halo estudu esploratóriu kona-bá sidade seguru liga ba forma violénsia hotu kontra feto no labarik-sira iha fatin públiku iha Dili no Baucau.

2018, halo avaliasaun merkadu bazeia ba jéneru iha Bobobaro no Baucau, 2019 rona opinaun hosi parte oi-oin halo komitmentu ba sidade seguru, inklui Governu no parseiru dezenbolvimentu sira.

Iha 2020 implementa sidade seguru, merkadu seguru hosi parte oi-oin iha nível lokál no autoridade munisipál.

Diskute planu ‘sidade no merkadu seguru’

Ohin mós parseiru dezenvolvimentu TOMAK, hamutuk ho autoridade munisipál Bobonaro inklui instituisaun relevante-sira, diskute planu ba programa ‘sidade seguru no merkadu seguru’ iha munisipiu ne’e.

Cecilia Fonseca esplika, inisiativa implementa sidade no merkadu seguru ne’e ho objetivu atu apoia líder munisipál atu dezenbolve no implementa polítika aprosimasaun, nune’e bele prevene asédiu seksuál no forma seluk hosi violénsia kontra feto no labarik feto-sira iha fatin públiku.

Alende ne’e, atu hadi’a oportunidade ekonómika, seguransa, saúde no bem-estár ba vendedór no to’os na’in-sira iha munisípiu ne’e.

Diskusaun ne’e espesifíkamente haree liu ba prioridade saida mak TOMAK ho autoridade munsipál atu realiza iha iha tinan lima oin mai.

Prezidente Autoridade munisípiu Bobonaro, Ernesto de Oliverira Barreto, agradese ba inisiativa ne’e, maibé atu alkansa objetivu ne’ebe TOMAK planeia presija kontribuisaun entidade hotu-hotu iha Munisipiu ne’e.

Autoridde munisipál ne’e garante katak, programa ne’e sei lori sustentabilidade ba vendedór-sira, feto vulnerável, LGBTI, ema ho defisiénsia no populasaun em jerál.

Tanba ne’e, entidade sira rekomenda katak, atu garante sidade no merkadu seguru, tenki konstrui merkadu ho modelu asesibilidade ba ema ho defisiénsia, kompletu ho saneamentu, seguransa, protesaun pesoál no mós instala CCTV, sinais tránzitu inklui instala ekipamentu prevensaun inséndiu iha merkadu publiku.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here