Sekertáriu Estadu Joventude no Despostu (SEJD), Abrão Saldanha. Imajen Tatoli/Francisco Sony

DILI, 28 jullu 2021 (TATOLI) – Ho propagasaun  peste letál COVID-19 ne’ebé lori ameasa foun ba mundu halo Governu Timor-Leste, liuhosi Sekretariu Estadu Juventude no Desportu (SEJD) deside Timor-Leste la partisipa iha  Tokyo Paralympic Games ne’ebé atu hala’o iha loron 30 agostu ne’e, iha Tokyo-Japaun.

Sekretáriu Estadu Juventude no Desportu (SEJD) Abrão Saldanha, klarifika katak tuir loloos atleta Timor-oan na’in-rua maka atu ba partisipa iha Paralympic Games maibé labele tanba sira la konsege tuir pra-kualifikasaun iha Xina tanba serka sanitária no Covid-19 sa’e maka’as iha Timor-Leste.

“Atleta na’in-rua maka atu ba maibé tenke ba lai tuir pra-kualifikasaun iha Xina no bainhira manan iha pra-kualifikasaun ne’e ho pontu boot mak bele ba partisipa. Sira la ba partisipa iha pra-kualifikasaun tanba momentu ne’ebá ita iha hela serka sanitária entaun vou aviaun laiha ita la ba,” Abrão Saldanha informa ba Agência Tatoli iha SEJD, Dili, kuarta ne’e.

Iha parte seluk bainhira atleta na’in rua ne’e atu ba partisipa Paralympic Games tenke iha teste kategorizasaun.

“Atleta-sira mós tenke iha lai teste kategoria, atu halo teste kategoria ida-ne’e, tenke ba halo iha Suisa, maibé tanba serka sanitária ita la konsege halo. Tanba ne’e mak ita la konsege ba partisipa iha jogu Paralympic Games,” Abrão Saldanha esplika.

Timor-Leste la prienxe duni rekizitu hotu Komité Paralympic  Internasionál, nune’e iha abríl liubá  hakerek karta mai Timor-Leste hodi labele partisipa jogu importante ne’e.

Sekretáriu Estadu Abrão Saldanha hateten, iha maiu liubá iha fali oportunidade di’ak ida ba Timor-Leste tanba Komité Paralympic  Internasionál  informa ba Timor-Leste bele partisipa iha jogu ne’e la liu hosi dalan kualifikasaun no liu de’it hosi dalan konvite.

“Hosi ida ne’e ita atu lori atleta ida hosi atletizmu nian, maibé seidauk nafatin iha kategoria tanba iha Timor-Leste seidauk iha espesialista médiku desportu ne’ebé bele kategoria ema nia kategoria iha defisiente atu partisipa iha jogu ne’e, sira husu ita-nia doutór halo tiha diagnóstiku ida la konsege nafatin, entaun ami analiza situasaun hotu deside kansela, ita la partisipa mós la fó impaktu. Di’ak hela,” nia hateten.

Iha sorin seluk, atleta atletizmu defisiente Teófilo Freitas hatete, treinamentu ne’ebé durante sira halo saugati de’it tanba labele ba partisipa iha jogu.

“Ami nia treinamentu durante ne’e laiha rezultadu tanba la bele ba partisipa iha jogu ne’e, tanba kansela ona. Kompetisaun iha tinan ne’e mós laiha ona atu ami tuir tan, treinu ne’ebé hala’o hanesan atleta hodi hasae nafatin ami nia prestasaun,” nia dehan.

Nudár atleta, Teófilo triste maibé haka’as an nafatin hala’o treinamentu  hodi prepara ba eventu sira nasiona ho internasionál tuir mai.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here