Diretór STAE munisípiu Baucau, Lucio Freitas Salvador. Imajen TATOLI/Natalino Belo

BAUCAU, 28 jullu 2021 (TATOLI)–Diretór Sekretariadu Tékniku Admistrasaun Eleitorál (STAE) munisípiu Baucau, Lucio Freitas Salvador, hateten, provizóriamente númeru votante iha Baucau iha aumentu 1.000 resin.

“Prosesu resensiamentu eleitorál hahú fali iha loron 01 jullu, tanba ne’e iha kreximentu eleitór, (aumentu), ne’ebé iha tinan 2018 ita iha 92.000 resin, maibé agora ne’e sa’e ba 93 resin, ita aumenta 1.000 resin,” Diretor STAE informa ba Agência TATOLI, iha ninia knaar fatin, kuarta ne’e.

Aumentu eleitór mai hosi sira ne’ebé foin atu hahú halo resensiamentu hanesan tinan 16 iha ona direitu hetan kartaun eleitorál, tuir lei númeru 16/2016 tanba antisipa bainhira tinan oin iha eleisaun la presiza ona halo resensamentu no seluk mak eleitór sira ne’ebé muda hela fatin hosi munisípiu seluk mai munisípiu Baucau.

STAE Baucau konsege paradu halo resensiamentu tanba serka sanitária kauza pandemia COVID-19 iha rejiaun ne’e, nune’e bele atualiza baze dadus hanesan parte preparasaun eleisaun prezidensiál ne’ebé sei realiza iha loron marsu 2022.

“Ita garante ema 92.000 sei tuir prosesu eleisaun, tanba ita sei halo eliminasaun ba eleitór ne’ebé óbitu ona,” nia akresenta.

Dadaun seidauk bele halo eleminasaun ba votante óbitu tanba xefe suku sira seidauk entrega kartaun eleitorál ba STAE Baucau no parte Servisu Solidariedade Sosiál no Banku Nasionál Komérsiu Timor-Leste (BNCTL, sigla Portugés) mak rekolla fali ne’ebé mak tuir regra loloos be própriadade kartaun eleitoral hosi STAE nian.

Família tenke entrega kartaun eleitorál óbitu

Tuir Diretór ne’e, eleitór ne’ebé mate ona tuir loloos família entrega ninia kartaun eleitorál ba STAE atu halo eleminasaun hosi baze dadus, atu nune’e dadus eleitór bele sai akuradu.

“Bazeia ba lei númeru 6/2016, katak xefe suku sira kada loron ualu  tenki relata eleitór sira ne’ebé óbitu mai STAE munisipál maibé to’o agora ita seidauk realiza,” Lucio esplika.

Maski nune’e, pontu vokál STAE iha terrenu sei koordena ho xefi suku no aldeia sira atu halo lista hamutuk ho kartaun eleitorál hosi ema ne’ebé mate ona, atu nune’e bele halo eleminasaun iha baze dadus.

Dadus fulan kotuk provizóriamente hamutuk 93.146, maibe seidauk akuradu tanba sei presiza halo eleminasaun ba eleitór sira ne’ebé mate ona.

Aleinde ne’e, STAE Baucau daudaun ne’e halo ona koordenasaun ho Prezidente Autoridade Munisípiu (PAM) hodi informa ba postu admistrativu sira atu identifika totál sentru votasaun inklui eleitór hodi establese sentru votasaun tuir kondisaun suku ka postu.

Antes ne’e, iha Baucau estabelese sentru votasaun hamutuk 98 no estasaun votu 123, maibé tanba pandemia, entaun tuir planu STAE Baucau aumenta tan sentru votasaun nune’e bele minimiza halibur malu no bele tuir protokolu saúde.

“Sentru votasaun agora sa’e ba 125, ho eleitór 93.000 resin, maibé ita mos la taka dalan bainhira orsamentu prevee no sufisiente bele aumenta di’ak liu atu antisipa distansiamentu fíziku, labele antri, no komunidade labele rabat malu iha sentru votasaun,” nia akresenta.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here