Xefe Estadu Maiór Jenerál F-FDTL, Tanente Jenerál Lere Anan Timur. Imajen TATOLI/Egas Cristovão.

DILI, 28 jullu 2021 (TATOLI)—Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Lere Anan Timur, informa rekrutamentu membru F-FDTL foun ne’e 40% prióridade ba jerasaun patriota.

Notísia Relevante: Kandidatu F-FDTL 10-resin iha kuarentena sei tuir teste

Rekrutamentu F-FDTL foun agora iha faze inspesaun nian no teste hotu ona. Agora ami sei halo avaliasaun sé mak liu no sé mak la liu. Maibé, 40% sempre fó prióridade ba jerasaun patriota,” Tenente Jenerál hateten ba jornalista sira, hafoin hasoru malu ho Prezidente Repúblika, Francisco Guterres Lú Olo, iha Palásiu Prezidensiál Nicolau Lobato, Bairru Pite, Dili, kuarta ne’e.

Jerasaun patriota ne’e la’ós uitoan maibé pasiénsia ba sira ne’ebé la pasa ne’e tanba forsa foun ne’e presiza de’it mak na’in-600, no hosi ema na’in -600 ne’e 60% mak ba jerál no 40% mak ba jerasaun patriota sira.

Tanba, nia informa, iha fulan-outubru tinan (2021) ne’e, sira-nia parte sei halo preparasaun ba rekrutamentu ba membru F-FDTL foun ema na’in-600 ba tinan oin nian, tanba planu 2020 halo rekrutamentu ba ema rihun 12 maibé tinan ne’e fó uluk ba ema 600 entaun tinan oin sei rekruta tán ema na’in-600.

Iha sorumutu ne’e, nia dehan, Prezidente Repúblika fó hanoin ba Tenente Jenerál tenke tau-matan didi’ak ba forsa sira liu-liu kona-bá seguransa, dixiplina, eirarkia sira-ne’e tenke metin nafatin iha instituisaun nia laran, tanba ho ida-ne’e mak instituisaun bele la’o seguru.

Selebra loron FALINTIL ho “Tour Falintil Dalan ba Dame”

Entretantu Lere Anan Timur informa selebrasaun loron FALINTIL ne’ebé selebra iha 20 agostu ne’e, tuir planu provizóriu, sei prenxe ho atividade “Tour Falintil Dalan ba Dame” iha Munisípiu Ainaro.

“Ami-nia objetivu atividade ‘Tour Falintil Dalan ba Dame’, tanba ita hatene katak uluk iha funu laran ne’e Timor-oan ho Timor-oan oho malu, liu-liu Partidu FRETILIN no Uniaun Demokrátiku Timorense (UDT) nia membru sira. Entaun hakarak haleu Timor hodi identifika fatin ne’e mak tau destaka ne’ebá,” nia dehan.

Tour Falintil Dalan ba Dame ne’e ho intensaun atu hatudu ba jerasaun foun sira katak hosi ai-fatin sira-ne’ebé membru F-FDTL sira hakat liu ne’e, fó hanoin fali kona-ba ema sira-ne’ebé mate ba rai ida-ne’e hodi bele fanu lideransa partidu istóriku sira atu tuur hamutuk hodi harii dame.

Maibé, nia dehan, karik pandemia COVID-19 sei eziste, ne’e depende fali ba desizaun Governu maibé kalkulu katak loron 20 agostu monu iha Munisípiu Ainaro, tanba F-FDTL seidauk halo eventu iha munisípiu refere.

Notísia Relevante: Troka esperiénsia téknika-tátika operasaun hanesan esersísiu dalan ba dame

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here