Prezidente Rede Feto Timor-Leste, Zelia Fernandes. Imajen/Espesiál.

DILI, 28 jullu 2021 (TATOLI)—Organizasaun Rede Feto Timor-Leste husu Parlamentu Nasionál (PN) liuhosi Komisaun F ne’ebé trata asuntu Saúde, Seguransa Sosiál no Igualdade Jéneru, atu konsidera paresér hotu-hotu hosi instituisaun oioin iha projetu-lei protesaun labarik no joven iha perigu, nune’e bele defende direitu labarik sira iha Timor-Leste.

“Ami-nia rekomendasaun nota katak títulu hosi projetu-lei ne’e rasik kloot, tanba ne’e ita husu atu títulu ne’e bele engloba (bele kobre buat hotu), tanba ne’e mak Parlamentu Nasionál bele rona opiniaun sira-ne’ebé hahú diskusaun inísiu,” Prezidente Rede Feto Timor-Leste, Zelia Fernandes, informa ba Agência TATOLI, iha nia kna’ar-fatin, Caicoli, Dili, kuarta ne’e.

Prezidente Rede Feto ne’e nota katak, iha artigu 1 hosi projetu-lei refere kona-ba objetivu la inkluziva, katak la akomoda no la refleta buat hotu-hotu tanba ne’e husu atu artigu 1 tenke engloba opiniaun hotu-hotu ne’ebé instituisaun relevante sira submete ona paresér ba uma fukun.

Nia dehan, Komisaun F tenke konsidera paresér hotu-hotu ne’ebé hato’o ona submisaun ba Komisaun F nune’e projetu-lei ne’e sai lei defende duni labarik sira iha territóriu nasionál.

Rede Feto mós konsidera artigu balun hosi projetu-lei orijinál laiha substánsia entaun Parlamentu Nasionál tenke esplora paresér sira molok elobra projetu-lei ne’e sai ba lei.

Organizasaun Rede Feto Timor-Leste ne’e mós hato’o ona paresér ba Komisaun F maibé seidauk bele fó-sai ho detallada kona-ba paresér ne’e.

“Komissaun F konsulta ona ho entidade lubuk ida, inklui mós Rede Feto hola parte nu’udar rede advokasia iha organizasaun lubuk ida iha-ne’e, iha hanoin lubuk ida-ne’ebé Rede Feto fó ona, liuhosi paresér no submisaun ne’ebé Rede Feto rasik halo hamutuk ho parséru no rede advokasia tomak,” nia dehan.

Nia nota projetu-lei ida ne’e foti referénsia hosi Portugál maibé importante mak sai ba lei kondiz ho realidade atuál.

“Atu hateten katak lei ne’e sempre iha nia defisiénsia, maibé ita hanoin katak bainhira rona hotu ona hanoin hosi entidade oioin bele hadi’a di’ak liután, no bele substitui buat balun ka muda buat balun iha artigu sira-ne’ebé mak hanoin katak ladún refleta ho kontestu Timor-Leste nian,” nia fó hanoin ba Komisaun F.

Nune’e, komisaun F rasik, halo ona esplikasaun no konsulta mós opiniaun ho Espoza Prezidente Repúblika nian, atu rona kona-bá proposta lei ne’ebé hatama ona.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here