Prezidente Parlamentu Nasionál, Aniceto Longuinhos Guterres Lopez.

DILI, 28 jullu 2021 (TATOLI)—Prezidente Parlamentu Nasionál (PPN), Deputadu Aniceto Longuinhos Guterres Lopes, sei fó pose ba Prezidente Komisaun Nasionál Eleisaun (CNE-sigla portugés) foun, José Agostinho da Costa Belo no komisáriu sira iha loron 6 agostu.

Notísia Relevante: José Belo eleitu sai Prezidente CNE

“Ha’u fiksa tiha ona data ba loron 6 agostu tanba iha loron ne’e Prezidente CNE no komisáriu sira atuál ne’e termina sira-nia mandatu,” Prezidente Parlamentu Nasionál informa ba jornalista sira, iha uma fukun, kuarta ne’e.

Ema na’in-tolu ne’ebé Parlamentu Nasionál nomea sai komisáriu mak hanesan Alcino de Araújo Báris (atuál prezidente CNE), Odete Maria Belo (atuál komisária CNE) no José Agostinho da Costa Belo (eleitu ba Prezidente CNE foun).

Entretantu lista membru ne’ebé dezigna ona hosi órgaun kompetente ba CNE mak hanesan Prezidente Repúblika nomea ona Olávio da Costa Monteiro de Almeida nu’udar membru efeitivu ba CNE no Detaviana Madalena Guterres Freitas, nu’udar membru suplente. Ne’e previstu iha dekretu Prezidente Repúblika númeru 41/2021, 1 jullu.

Carlito Martins nomea hosi Governu nu’udar membru efetivu no Elvino Bonaparte do Rêgo, nu’udar membru suplente (karta ofisiál haruka iha loron 9 jullu 2021).

Purtantu hosi Konsellu Superiór Majistradu Judisiál nomea Antonino Gonçalves eleitu nu’udar membru efetivu no João Ribeiro nu’udar suplemente, ne’e dezigna hosi Tribunál Rekursu, ne’ebé haruka iha loron 30 juñu 2021.

Konsellu Superiór Ministériu Públiku indikia Domingos Barreto eleitu nu’udar membru efetivu no Napolião Soares da Silva nu’udar membru suplente (karta ofisiál haruka iha loron 5 jullu 2021).

Bazea ba lei órgaun administrasaun eleitorál katak, Prezidente Parlamentu Nasionál mak sei fó pose hafoin dezignasaun.

Estrutura anteriór Komisaun Nasionál Eleisaun iha komisáriu na’in-hitu (7), ne’ebé nomea hosi Presidente Repúblika mak Komisáriu José Agostinho da Costa Belo, Odete Maria Belo nomea hosi Governu.

Parlamentu Nasionál nomea Alcino de Araújo Barris, Maria Virna Ermelinda Soares no Bernardo Natalino Cardoso, Konsellu Superiór Majistriadu Judisiál indika Afonso Carmona, no  Domingos Barreto nomea hosi Konsellu Superiór Ministériu Públiku.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here