Hare iha Atabae. Imajen TATOLI/António Gonçalves

DILI, 28 jullu 2021 (TATOLI)–Organizasaun Naun Governamentál (ONG) La’o Hamutuk (LH) sujere atu Governu bele dezeña polítika investimentu ne’ebé produtivu no sustentável, hodi bele harii rekursu umanu ne’ebé sai poténsia atu hametin ekonomia rai laran no rezolve problema estruturál sira ne’ebé satan netik dalan ba moris di’ak povu tomak.

“Hanesan Governu rasik rekoñese, Fundu Petrolíferu bele hotu iha tinan 10 no Timor-Leste seidauk identifika no dezenvolve setór ekonómiku sustentável ne’ebé bele substitui produsaun mina no gas husi Bayu-undan ne’ebé sei ramata,” refere nota kmunikadu hosi La’o Hamutuk ne’ebé Agência TATOLI asesu iha kuarta ne’e.

Sosiedade sivíl ne’e konsidera, Timor-Leste nia kapasidade atu finansia servisu báziku hanesan saúde no edukasaun, sei perigozu tebes bainhira Fundu Petrolíferu laiha sustentabilidade.

“Hela tinan balun atu hametin servisu báziku, no ami hein katak parseiru dezenvolvimentu bele servisu besik hamutuk ho Governu atu aproveita tempu tuir mai atu estabelese rekursu edukasaun, saúde, no bee moos ne’ebé forte, hodi asegura fornesimentu servisu báziku bele la’o nafatin iha futuru maski rekursu finanseiru Governu nian sei menus”, relata nota imprensa ne’e.

Ho limitasaun rekursu ekonómiku, Timor-Leste sei iha kapasidade menus atu selu fali deve ka empréstimu iha futuru. La’o Hamutuk enkoraja parseiru dezenvolvimentu sira atu kontinua ho hanoin kle’an ho baze estudu no evidénsia antes deside atu enkoraja Governu Timor-Leste kontinua ho projetu sira ne’ebé finansia ho empréstimu ka lae.

Sorin seluk, LH haree mudansa klimátika hanesan ameasa ida ne’ebé bele hafraku esforsu hotu atu hadi’a povu nia moris. Intervensaun iha setór agrikultura no peska, nutrisaun, asesu ba bee moos, infrastrutura báziku no seluk-seluk tan sei la hetan susesu se ita la hasoru problema mudansa klimátika.

Nune’e, kontribuisaun Timor-Leste ba mudansa klimátika sei menus liu kompara ho nasaun industrializadu, maibé Timor-Leste vulneravel tebes ba impaktu mudansa klimátika. Daudaun ne’e Timor-Leste sai tarjetu projetu parseiru dezenvolvimentu nian atu adapta-an ba mudansa klimátika, ka partisipa iha projetu atu offset impaktu husi emisaun iha fatin seluk, liu husi kuda ai.

Maski importante duni atu hala’o adaptasaun, La’o Hamutuk haree mós katak nasaun boot sira ne’ebé industrializadu falta atu hamenus sira nia emisaun gas estufa. Timor-Leste la bele adapta-an tinan-ba- tinan ba futuru ba situasaun ne’ebé kontinua sai grave ba beibeik.

Hanesan mós ho programa offset sira; programa offset sira sei la fó benefísiu ida ba hadi’ak klima se bainhira nasaun industrializadu sira kontinua hodi prodús emisaun tuir sira nia hakarak rasik, no iha posibilidade katak programa hanesan ne’e bele fó impaktu negativu ba seguransa ai-han tanba rai produtivu sira kiik.

Kona-ba diversifikasaun Ekonomia, produsaun iha Kampu Bayu-undan kuaze ramata ona, no Timor-Leste hasoru situasaun difisil. Labele depende nafatin ba indústria estrativa atu sustenta ita nia populasaun no Governu.

Diversifikasaun ekonomia bele hamenus ita-nia vulnerabilidade ba rekursu naun-renovavel ne’ebé sai maran, haforsa ita nia ekonomia ba mudansa ka xoke sira iha ekonomia mundiál, hamenus dependénsia ba importasaun, no oferese oportunidade ba ema barak liu ho interese no kapasidade oi-oin. Hanoin mós ameasa husi mudansa klimátika, tanba ne’e LH haree katak diversifikasaun ekonomia bele hamenus ita-nia impaktu ba ambiente.

LH mós hanoin katak ekonomia diversifikadu bele mai husi atividade ekonómiku iha baze, no ita sei la konsege atinje diversidade ekonómiku ne’ebé di’ak ba povu tomak no ambiente sei ita foka ba projetu boot de’it.

Dala barak, mega projetu falta atu hadi’a moris ema hothotu, no oferese oportunidade limitadu ba longu prazu. Nudár ezemplu ida, se ita kalkula ema tomak ne’ebé sei emprega husi projetu boot hanesan fábrika Heineken nian, portu Tibar, fábrika semen TL Cement nian, rezort Pelican Paradise, no Projetu Tasi Mane, oportunidade atu servisu sei ki’ik liu kompara ho númeru ema ne’ebé tama kategoria ‘populasaun ho idade servisu’ kada fulan.1

Iha posibilidade katak ekonomia ne’ebé sustentável, inkluzivu no iha diversidade sei la prodús reseita bo-boot ka fó impaktu ba sasukat hanesan GDP kompara ho produsaun mina no gas. Maibé, diversifikasaun ekonomia bele fó benefísiu longu prazu ba nasaun tomak.

LH apresia ba apoiu ne’ebé durante ne’e fornese husi parseiru dezenvolvimentu sira mai iha Timor-Leste. Maske iha apoiu oioin ne’ebé la’o ona iha tempu naruk ba edukasaun, saúde, bee-moos no saneamentu, agrikultura no apoiu seluk relasiona ho mudansa klimátika, nota katak seidauk asegura oinsá atu bele hametin prinsípiu partisipasaun no garante sustentabilidade ba povu ki’ik Timor-Leste.

LH sujere katak intervensaun hotu husi doadór sira, presiza haktuir ba nesesidade no kondisaun moris, no haktuir prinsípiu partisipasaun, transparénsia no akontabilidade, kolaborasaun, no sustentabilidade.

Partisipasaun povu tomak iha prosesu dezenvolvimentu nudár xave prinsipál ba atinjimentu sira, bainhira povu hola parte iha planu inísiu ba aspetu hotu ne’ebé liga direta ba povu nia moris.

Haree ba transparénsia no akontabilidade LH preokupa ho transparénsia husi governu ne’ebé tinan ba tinan menus ba beibeik. Inklui OGE 2021 ne’ebé menus liu nia transparénsia iha alokasaun sira tuir programa maibé laiha nia detallu ba programa boot hirak nee. Mekanizmu balun atu hadi’ak transparénsia hanesan Portal aAprovizionamentu no Portal Rezultadu agora la funsiona.

La’o Hamutuk sempre prontu atu oferese ami nia kontribuisaun analítiku hodi ajuda governu no parseiru dezenvolvimentu sira hodi halo diskusaun kle’an liu tan ba diresaun dezenvolvimentu iha Timor-Leste.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here