Xefe suku Fatucahi, Moises Acaçio da Costa Pinto ‘Labalaba’. Imajen TATOLI/Natalino Costa

MANUFAHI, 28 jullu 2021 (TATOLI)—Xefe suku Fatucahi, postu administrativu Fatuberliu, munisípiu Manufahi, Moises Acaçio da Costa Pinto ‘Labalaba’, hateten, komunidade iha suku ne’e seidauk asesu infraestrutura bázika hanesan estrada, bee-moos no eletrisidade ho másimu no kontinua halerik.

“Asesu bee-moos ba komunidade 75% ona, enkuantu bee-moos 25% maka seidauk asesu, tanba ne’e ha’u rasik hatama pedidu dala hira ona maibé to’o ohin loron seidauk hetan resposta no ha’u la hatene tanba saida, komunidade iha fatin ne’e kontinua hasoru difikuldade,” Autoridade lokál informa iha ninia rezidénsia, suku Fatucahi, kuarta ne’e.

Enkuantu, iha aldeia Hadulas no Tudik Tuan, iha família hamutuk 90 maka la asesu ba eletrisidade.

“Kona-ba eletrisidade, bele dehan 95%, tanba ne’e liuhosi Ministériu Obra Públika (MOP),  ita diriji ona pedidu balun atu apoiu tenaga surya  ba ita-nia komunidade sira ne’ebé seidauk asesu ba eletrisidade atu provizóriamente bele hetan naroman,” nia akresenta.

Enkuantu, kona-ba estrada, komunidade sira iha aldeia Fatuk Mutin no Kledik maka iha estrada ho kondisaun grave, ne’ebé motor bele liu maibé karreta labele.

Estrada kuaze kilómentru 25 hosi villa ba foho, maski MOP iha ona planu reabilitasaun estrada rurál faze dahuluk ho kilómetru 12.

“Komunidade sira transporta produtu ho kuda de’it no balun lalin. Ha’u rasik hato’o ona pedidu ba MOP no Instititu Jestaun Ekipamentu  (IGE, sigla portugés) atubele hadia dalan tanba ha’u nia ema naton mate tanba moras no labele salva nia vida tanba karreta la tama, kondisaun estrada a’at no familia sira konsege lori maibé iis kotu iha dalan no kazu hanesan ne’e akontese tinan tolu tutuir malu iha tinan 2016,  2017 no 2018,” nia haktuir.

Entretantu, totál uma-kain hosi suku Fatucahi hamutuk 618, populasaun hamutuk 2.024, no iha aldeia lima hanesan Fatubesi, Fatigue, Fatuk Mutin Fukiran no Kledik.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here