Koordenadór Sentru Treinamentu Knua Buka Hatene (KBH), Almeiro Lote dos Reis. Imajen Tatoli/Nelia Fernandes.

DILI, 28 jullu 2021 (TATOLI) — Sentru Formasaun Knua Buka Hatene (KBH) halo kolaborasaun ho Center For Korean Studies (CKS), hodi implementa formasaun lian korea ba joven sira iha sentru refere.

Objetivu hosi koolaborasaun ne’e, atu fó kapasitasaun ba juventude dezempregu sira hodi hasa’e sira-nia koñesimentu iha lian Korea nian.

Koordenadór Sentru Treinementu Knua Buka Hatene (KBH), Almeiro Lote dos Reis, esplika iha inísiu atividade formasaun lian Korea ne’e fasilita de’it joventude sira atu koñese lian Korea nian, no la hanoin atu fasilita joven sira ba servisu iha Korea.

Maibé depois formasaun fulan-tolu hamosu inisiativa ida hosi formadór KBH katak tenke halo koolaborasaun hamutuk ho Center For Korean Studies (CKS), atu nune’e partisipante sira bele tuir kompetisaun ezame iha kursu refere.

“Ami halo ona kooperasaun ho Diretor of Korean Language KBH, Chang Won Choi, atu nune’e nia bele asina ami-nia akordu kooperasaun, no koordenadór Center For Korean Studies (CKS) sira mós bele asina sertifikadu ba lian Korea ne’ebé KBH prodús, entaun sertifikadu ne’e KBH mós asina no Center For Korean Studies mós asina sertifikadu ne’e,” nia katak.

Alende sertifikadu, iha mós nota ida ne’ebé KBH ho Center For Korean Studies (CKS) oferese nune’e formandu sira bele reprezenta organizasaun Knua Buka Hatene (KBH) tuir ezame ne’ebé lidera hosi SEFOPE.

“Ami-nia kooperasaun ne’e hahú ona, ho nia durasaun tempu ne’ebé naruk, maibé primeiru ami haree uluk durasaun ba fulan-neen nian, bainhira ita haree iha mudansa maka ami foin bele kontinua fali ho durasaun tempu naruk nian,” nia hateten.

Entretantu, sentru ne’e rasik hahú ona formasaun ba área lian Korea iha tinan 2021 no formandu ne’ebé tuir ona formasaun ba lian korea hamutuk 50.

“Matéria ne’ebé formandu sira aprende báziku nian hanesan alfabetu, númeru no aprende mós oinsá hakerek no lé ho lian Korea nian,” nia katak.

Iha sorin seluk, Formadór Center For Korean Studies (CKS), Brismo Gusmão katak koordenasaun ne’e la’o tanba joven barak presiza lian korea, tanba hakarak ba serbisu iha rai-li’ur.

Kolaborasaun entre organizasaun rua ne’e tanba haree ba sentru formasaun lian Korea iha Becora ne’ebé limitadu.

“Ne’e bele transforma fali koñesimentu ba ita-nia juventude sira-ne’ebé presiza lian Korea no ami mós lakohi lakon ho esperiénsia ne’ebé ami hetan iha Korea, entaun ami haree fatin sentru sira hanesan sentru KBH ne’e, entaun ami loke formasaun lian korea iha-ne’e atu ema hotu-hotu bele mai tuir kursu lian Korea iha ne’e,” nia katak.

 Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here