Kondisaun atuál semitériu Luka-oan, iha suku Osorua, munisípiu Viqueque, kuarta (28/07/21). Imajen Tatoli/Vitorino Lopes da Costa.

VIQUEQUE, 28 jullu 2021 (TATOLI)—Administradór postu administrativu Ossu, Agostinho Sousa, husu Governu atu prepara kondisaun ba semitériu Luka-oan iha suku Osorua, munisípiu Viqueque, ne’ebé antes ne’e deside ona sai hanesan jardím dos herois.

“Ita iha ona fatin ba heroi-sira, maibé seidauk hadi’a. Governu presiza tau-matan, tanba parte hotu-hotu deside ona sai jardím dos herois,” Agostinho de Sousa, hateten ba jornalista Agência Tatoli, iha semitériu Luka-oan, kuarta ne’e.

Notísia relevante:Saudozu ‘Mafo Maleo’ hakotu-iis tanba moras komplikadu

Kona-bá preokupasaun ne’e, reprezentante Konsellu Kombatente Libertasaun Nasionál (CCLN, sígla portugés) munisípiu Viqueque, Manuel Gomes da Silva, responde katak, Prezidente CCLN munisípiu Viqueque tau ona iha prioridade atu hadi’a.

Nia dehan, Prezidente CCLN Viqueque esforsu makás atu hadi’a duni semitériu ne’e, tanba ne’e mak oras-ne’e haloot ona heroi na’in-hitu iha fatin ne’e.

Maski Estadu seidauk fó apoiu, maibé veteranu-sira hosi munisípiu ne’e, halo ona kontribuisaun rihun $3, hodi halo uma no prepara fasilidade sanitária iha semitériu ne’e.

“Ami seidauk bele hala’o konstrusaun tanba situasaun COVID-19, maibé bainhira situasaun rekoperadu, sei hahú halo serbisu,” Manuel Gomes da Silva, promete.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here