Ministru Prezidénsia Konsellu Ministru, Fidelis Manuel Leite Magalhães. Imajen TATOLI/Egas Cristóvão

DILI, 28 jullu 2021 (TATOLI)–Governu husu ba timor-oan sira ne’ebé daudaun hela iha rai-li’ur atu proteje-an hosi COVID-19 varian delta, ne’ebé espalla ona iha nasaun viziñu sira hanesan Indonézia no nasaun seluk tan.

“Husu estudante sira iha rai-li’ur hola medida atu proteje-an tanba ita iha preokupasaun difísil ida no sorin seluk garante katak estudante ou timor-oan sira iha rai-li’ur hetan protesaun másima,” Ministru Prezidénsia Konsellu Ministru no Portavóz Governu, Fidelis Manuel Leite Magalhães, hateten, iha Palásiu Governu, kuarta ne’e.

Notísia relevante: TL rejista pasiente infetadu variante delta na’in-haat

Aleinde ne’e, nia husu ba timor-oan sira atu labele komete neglijénsia ka responsabilidade balun ne’ebé ariska an no loke dalan hodi lori moras mai Timór.

“Ema hotu kestiona katak tenke taka totál fronteira, maibé tenke preokupa mós ba estudante sira iha estranjeiru, ne’ebé saida mak Governu halo maka liuhosi Embaixada sira, liliu Indonézia atu koordena nafatin ho adidu edukasaun hodi komunika nafatin ho estudante sira,” nia akresenta.

Governu nota katak durante implementasaun Estadu emerjénsia dahuluk to’o agora, ligadu ho taka fronteira, mosu krítika maka’as.

“Maibé tenke halo jestaun di’ak tanba taka de’it fronteira sein jestaun di’ak, númeru bele aumenta maka’as, tanba ne’e maka tenke halo jestaun di’ak iha fronteira no pontu Estrada sira seluk,” nia akresenta.

Polítika vasina iha nasaun seluk la hanesan

Ministru Fidelis hateten, nasaun seluk ninia polítika vasinasaun la hanesan, katak iha nasaun balun hili vasina ne’ebé ladún forte kontra variante, maibé nasaun balun vasina ne’e sira foku liu ba sira-nia ema, la’ós ema estranjeiru, tanba ne’e, reprezentante Timor-Leste iha rai-li’ur tenke haree sidadaun sira atubele iha asesu ba vasina.

Iha parte seluk, Governu buka dalan nafatin atu timor-oan sira bele fila mai Timór tanba tuir Konstituisaun, katak sidadaun iha direitu atu fila ba sira-nia rain.

“Tanba ne’e, ita sira iha ne’e labele hanoin ita-nia an de’it hodi nega sira iha rai-li’úr. Ne’ebé timor-oan sira iha rai-li’ur tanba situasaun iha ne’ebá la permite no hakarak fila maka Governu buka dalan ba sira, maibé Governu mós asegura katak sira bele kumpre rekezitu sira hanesan kuarentena atubele identifika karik sira lori variante foun iha sira-nia isin,” nia subliña.

Governu daudaun ne’e halo esforsu atu iha Timor-Leste labele hanesan ho nasaun sira seluk, maibé atu prevene ida-ne’e depende ba konsiénsia sidadaun sira, tantu iha rai-laran no rai-li’ur, atu nune’e proteje sira-nia an no família.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here