Pasajeiru sira tuun iha Aeroportu Comoro, tersa (30/03). Imajen TATOLI/António Gonçalves

DILI, 28 jullu 2021 (TATOLI)—Ministériu Justisa (MJ), liuhosi Diresaun Jerál Serbisu Rejistu no Notariadu (DGSRN sígla portugés), iha fulan janeiru to’o jullu tinan ne’e, sertifika ona ema estranjeiru na’in 154 sai sidadaun Timor.

Númeru ne’e maihosi Indonézia 151, Portugal na’in-rua ho Myanmar na’in-ida ne’ebé hetan ona nasionalidade timor tanba kazamentu ka kaben ho timor-oan.

Notísia relevante:Sidadaun estranjeiru atu hetan nasionalidade Timor tenke halo rekerimentu ba MJ

“Sidadaun hirak-ne’e prienxe ona kritéria ba prosesu rekerimentu ho dokumentu komprovativu hanesan sertidaun kazamentu, sertidaun moris, hela iha Timor mínimu tinan lima no másimu tinan 10 ba leten, iha vistu no pasaporte hosi nasaun orijen, vistu rezidénsia permanénsia iha Timor no sertidaun moris,” Diretór Jerál Serbisu Rejistu Notariadu, Crisogno da Costa Neto, hateten ba jornalista Agência Tatoli, kuarta ne’e.

Serbisu Rejistu Notariadu ho kooperasaun Ministériu Edukasaun  Joventude no Desportu halo mós teste matéria língua ho kultura ne’ebé pasa no verifikasaun komportamentu liuhosi Ministériu Públiku.

Sertifikasaun nasionalidade ne’e, liuhosi kategoria tolu mak hanesan por kazamentu (kaben ho ema timor-oan), naturalizasaun no naturalizasaun hosi altu relevante.

Tuir regulamentu ba lei, nasionalidade nu’udár diploma legál ne’ebé permite atu implementa lei nasionalidade nú.9/2002,5 novembru no lei ida-ne’e haree kona-bá norma hirak ne’ebé tau iha artigu 3 Konstituisaun Repúblika Demokrátika Timor-Leste.

Notísia relevante:Ema estranjeiru na’in-1.020 sai sidadaun Timor

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here