Edifísiu CBC iha Villa nova, Baucau. Imajen TATOLI/Natalino Belo

BAUCAU, 28 jullu 2021 (TATOLI)–Diretór Ezekutivu Sentru Dezenvolvementu Komunitária (CDC, sigla portugés), Vicente Matos Belo, hateten, atividade formasaun hahú reativa fali hafoin serka sanitária iha munisípiu Baucau ramata.

“Agora iha faze preparasaun hela, iha ne’e sira ne’ebé tuir formasaun regular daudaun ne’e estájiu no ami sei halo gradusaun iha loron 27 agostu,” Diretor CDC, informa ba Agência TATOLI, iha ninia knaar fatin, Triloka, Baucau, kuarta ne’e.

CDC hanesan sentru formasaun profesionál ne’ebé hetan karta sirkulár hosi Diresaun Nasionál Formasaun Profisionál (DNFP) hosi Sekretaria Estadu Formasaun Profisionál no Empregu (SEFOPE) ne’ebé haruka atu hahú atividade formasaun profisionál iha loron 02 agostu.

Aleinde prepara kondisaun, daudaun sentru ne’e kria hela kondisaun atu formandu sira bele kumpre regra prevensaun saúde, nune’e bele fó formasaun green job ba joven iha Baucau.

CDC hanesan sentru formasaun ba área agrikultura ne’ebé ninia matéria bazeia ba kuríkulu ne’ebé prodúz hosi Instituto Nacional Dezenvolvimento Mão de Obra (INDIMO).

Objetivu hosi formasaun iha sentru ne’e mak atu fasilita matéria atu hasa’e koñesimentu no abilidade, nune’e bele kria kampu traballu iha formandu sira-nia suku inklui bele responde ba iha kampu traballu.

CDC prodúz ona graduante na’in 18, ne’ebé sai hanesan traballadór iha Austrália relasiona ho programa sazonál, ne’ebé hato’o hosi Governu australianu iha área agrikultura rasik.

“Iha na’in-18 mak ba servisu iha Austrália maibé na’in-neen mak fila ona no hela na’in-12 mak daudaun ne’e sei kontinua hala’o servisu iha Austrália,”nia akresenta.

Graduante balun kria grupu iha sira-nia suku hanesan prodúz no fa’an produtu agríkola iha merkadu hanesan iha Lautém no iha Baucau, suku Buruma, Bukoli, enkuantu seluk kontinua estudu iha nível universitária no kursu inglés.

CDC rejista ona totál formandu ba tinan 2021 hamutuk na’in 31, kompostu hosi feto na’in 15 no mane 16, mai hosi munisípiu Viqueque, Aileu no postu lima iha Baucau hanesan Vemasse, Laga, Quelicai no Baguia hosi munisípiu Baucau rasik.

Sentru ne’e iha profisionál formadór hamutuk na’in-13, kompostu hosi na’in-ualu hetan ona sertifikadu hosi INDIMO no na’in-lima seidauk, formadór na’in-ida no asistente na’in-haat.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here