Membru Country Coordinator Mechanism (CCM), realiza enkontru preparativus fiskalizasun ba utilizasaun fundu global iha Timor-Leste. Iha salaun City 8 Manleu, kuarta (28/07). Imajen Tatoli/Francisco Sony

DILI, 28 jullu 2021 (TATOLI)-Programa Asembleia Nasionál ba Country Coordinating Mechanism (CCM), kuarta ne’e, iha salaun City-8, Manleuana, Dili, hala’o  reuniaun  ho parseiru Ministériu Saúde (MS) hodi halo avaliasaun ba funsionamentu CCM nian iha Timor-Leste.

Vise-Prezidente CCM no koordenadór Gabinete Apoiu Sosiedade Sivíl (GASC,) Filipe da Costa hateten, sira halo avaliasaun ba servisu CCM nian iha TL tanba atividade ne’ebé CCM hala’o durante ne’e hetan apoiu fundu hosi Fundu Global.

Nia hatutan, avaliasaun hosi CCM nian ne’ebé durante hala’o iha TL mak CCM halo fiskalizasaun ba implementasaun fundu global iha TL. Tanba oras ne’e daudaun fundu global ne’ebé implementa iha TL ne’e liuhosi Ministériu Saúde.

“Fundu Global ne’ebé CCM apoiu ba Ministériu Saúde ba siklu 2021-2023 ne’e hamutuk millaun $15.7 ba iha programa HIV-SIDA, Malária no TBC, no millaun $4.7 ba programa COVID-19 no orsamentu sira ne’e aprovadu hotu ona agora daudaun iha hela prosesu implementasaun hosi MS,” Filipe da Costa hateten.

Progresu CCM nian ne’ebé liuhosi Ministériu Saúde implementa ba iha programa tolu, HIV-SIDA, TBC, no Malária ne’e ninia progresu mak halo fiskalizasaun rutina ba implementasaun fundu globál iha TL.

Nia afirma, hosi fiskalizasaun sira ne’e rezultadu relata fila-fali ba fundu globál no membru CCM hotu entaun durante implementa fundu globál problema ne’ebé sira identifika iha parte saúde mak hanesan, dezeñu espasu iha sentru saúde ladún uniforme, iha fatin balu hanesan espasu ba laboratóriu balu boot, ki’ik no balu fatin laboratóriu laiha tan. Tanba ne’e, liuhosi enkontru ne’e, hamutuk ho MS fó hanoin ba malu hodi mellora servisu sira-ne’e.

Xefe Departamentu Tuberkuloze Nasionál, Constantino Lopes hateten, fundu global ne’ebé MS implementa ba iha programa, HIV-SIDA, TBC no malaria, haree malaria redús, maibé TBC ho HIV-SIDA sei iha númeru ne’ebé makaas.

Kada tinan fundu global apoiu orsamentu ba MS oinsá kontrola moras tolu ne’e, maibé entre moras tolu ne’e daudaun Tuberkuloze sai hanesan problema boot tanba ema ne’ebé afeta hamutuk 6.000 no ema mate ba TBC liu 5.000.

Nia afirma, kada tinan tuir espetativa TBC, MS tenke hetan pasiente 6.000, maibé tinan kotuk ne’e hetan de’it  3.000 no tinan ida menus liu 3.000 tanba situasaun COVID-19 ema ladún halo tratamentu ba iha Sentru Saúde sira.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here