Diretora CMTC, Madre Sonia Sangel. Imajen Tatoli/Nelia Fernandes.

DILI, 28 jullu 2021 (TATOLI)—Canossa Magalhães Training Center (CMTC) Lecidere oferese formasaun lian Mandarin ba joven sira iha Timor-Leste.

Diretora CMTC, Madre Sonia Sangel, esplika sentru ne’e realiza formasaun lían Mandarin ba joven sira ho objetivu atu prepara foinsa’e sira kompete iha bolsa estudu Repúblika Populár Xina nian.

“Formasaun lian Mandarin ne’e hodi fasilita joven sira, nune’e bainhira blsu estudu Xina nian loke ne’e joven sira bele kompete. Daudaun ne’e formandu balun ne’ebé tuir formasaun ne’e, prepara hela sira-nia an tanba sira simu bolsa estudu atu ba Xina,” Madre Sonia Sangel informa ba Agência TATOLI, iha nia kna’ar-fatin, Lecidere, Dili, kuarta ne’e.

Atividade formasaun lian Mandarin ne’e hahú iha fulan-janeiru tinan ne’e maibé paradu iha fulan-marsu, bainhira Governu implementa serka sanitária no konfinamentu obrigatóriu, nune’e atividade formasaun reativa hikas iha fulan-jullu.

“Matéria formasaun ba lian Mandarin, formandu sira aprende kona-ba alfabetu, númeru, aprende oinsá atu hakerek no lee kona-bá lian Mandarin ne’e rasik,” nia dehan.

Imajen Tatoli/Nelia Fernandes.

Durasaun formasaun lian Mandarin ne’e fulan tolu (#) ho totál formandu hamutuk na’in-20. Totál formadór ba lian Mandarin nian hamutuk na’in-sia (9) no hosi númeru ne’e formadór sira mai hosi Timor-oan ne’ebé estuda iha Xina.

Canossa Magalhães Training Center Lecidere (CMTC) estabelese iha tinan 2015, ne’ebé funda hosi ema Portugués ho naran Magalhães ho objetivu atu kapasita joven sira hodi bele hatene lian Mandarin.

“Área formasaun iha Canossa Magalhães Training Center Lecidere, oferese kursu ba juventude no labarik sira mak hanesan lian inglés, portugés, mandarin, komputadór, administrasaun, finansa no matématika,” nia hateten.

Totál formandu ne’ebé tuir formasaun iha Canossa Magalhães Training Center Lecidere ne’e hamutuk 1.557.

Hosi númeru ne’e formandu sira mai hosi estudante, labarik, jove no funsionáriu sira. Enkuantu totál funsionáriu hamutuk na’in-13 kompostu hosi na’in-lima no formadór na’in-ualu.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here