Autoridade RAEOA halo sensibilizasaun ‘Programa Suku Amasat’ ba autoridade lokál sira. Imajen Tatoli/Abilio Elo Nini.

OÉ-CUSSE, 28 Jullu 2021 (TATOLI)—Autoridade Rejiaun Administrativa Espesiál Oé-Cusse Ambeno (RAEOA), kuarte ne’e halo sensibilizasaun ba ‘Programa Suku Amasat’ (suku furak no kapaas) ba autoridade lokál sira hosi suku 18 ho jestór sub-rejiaun haat (4). 

Prezidente Autoridade RAEOA, Arsénio Paixão Bano, hateten ‘Programa Suku Amasat’ ne’e hanesan polítika ida hosi autoridade RAEOA atu promove suku 18 ho aldeia 63, atu partisipa iha servisu nivél suku ho kreativu, inovativu, independente, inkluzivu no sustentavél.

“Prezensa ‘Programa Suku Amasat’ ne’e ba populasaun atu bele iha forsa, vontade, obrigasaun atu servisu no involve iha dezenvolvimentu iha nivél suku,” Arsenio Paixão Bano hateten lia hirak ne’e iha Programa Suku Amasat iha salaun Administrasaun Numbei, Pante Makasar, Oé-Cusse, kuarta ne’e.

Programa ne’e sei hetan apoiu finanseiru hosi autoridade RAEOA ho valór rihun $2 ba leten, nu’udár fundu ne’ebé uza hodi dezenvolve suku no hanesan maneira kompetisaun entre suku ida ba suku seluk.

Objetivu hosi politika ne’e, atu motiva komunidade sira iha suku atu bele partisipa direta ba progresu dezenvolvimentu tuir politika autoridade RAEOA nian, nune’e bele hadia atendimentu iha kada suku.

Politika ida-ne’e sei motiva konsellu suku sira atu ativu liutan hodi hametin kolaborasaun servisu ho autoridade ba dezenvolvimentu iha nivél lokál.

Programa ida-ne’e atu hatene partisipasaun konsellu suku no komunidade iha suku ba dezenvolvimentu no progresu kualidade moris nian iha setór saúde, edukasaun, sosiál, kultura, turizmu komunitaria, seguransa no kumpre ordén públika.

Tuir nia, xefe suku no konsellu suku tenke iha apoia kapasidade hosi autoridade, nune’e bele superviziona involve iha implemetasaun, avaliasaun no manutensaun, nune’e nia rezultadu bele haree katak saida mak halo iha suku laran.

Tanba xefe suku no aldeia hili hosi povu liuhosi eleisaun suku, entaun tenke iha responsabilidade tuir lei atu haree no avalia dezenvolvimentu iha suku. Ho ida-ne’e mak autoridade RAEOA hakarak halo kontratu liuhosi asina memorandu entendementu (MoU) ho suku sira nune’e bele hala’o iha suku ida-idak.

Entretantu Xefe Suku Taiboko, sub-rejiaun Pante Makasar, Joaquin Tafin, hato’o agradese ba autoridade RAEOA tanba Programa Suku Amasat ne’e foin primeira-vez realiza iha Timor-Leste no iha Oé-Cusse.

“Ha’u agradese ba autoridade tanba Oé-Cusse rai-ketan iha Timor-Leste, entaum tenke hatudu ezemplu di’ak liuhosi Programa Suku Amasat tanba polítika ida-ne’e foin primeira-ves realiza iha Timor-Leste,” nia dehan.

Jornalista : Abílio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here