Uma Kbiit-Laek. Imajen/Espesiál

OÉ-CUSSE, 28 Jullu 2021 (TATOLI)—Diretór PNDS Rejiaun Administrativa Espesiál Oé-Cusse Ambeno (RAEOA), Sebastião Tanesi, informa iha loron 05 fulan-agostu ne’e Governu liuhosi Ministériu Administrasaun Estatál (MAE) sei hatuur fatuk dahuluk ba konstrusaun “Uma Kbiit Laek” iha Oé-Cusse.

Notísia Relevante: Ekipa PNDS halo sensibilizasaun programa “Uma Kbiit Laek” iha RAEOA

hateten ekipa hosi Programa Nasionál Dezenvolvimentu Suku (PNDS) identifika ona ema kbiit laek na’in-36 mak sai benefisiáriu ba programa Uma Kbiit Laek (UKL) iha tinan 2021.

“Dadús ne’e ami relata ona ba iha nasionál no ami simu orientasaun hosi nasionál katak iha loron 05 agostu tenke halo ona serimónia hatuur fatuk dahuluk ba konstrusaun Uma Kbiit Laek iha Oé-Cusse. Ami identifika ona fatin ba serimónia hatuur fatuk dahuluk tanba Ministru Administrasaun Estatál (MAE), Miguel Pereira de Carvalho mak sei hatuur fatuk dahuluk ne’e,” Sebastião Tanesi hateten ba Agência Tatoli iha nia servisu fatin, Palaban, Pante Makasar, Oé-Cusse, kuarta ne’e.

Lista benefisiáriu 36 ne’e haruka ba nasionál no kada konstrusaun “Uma Kbiit Laek” ida ho nia montante rihun $14 to’o $17. Daudaun ne’e, ekipa PNDS seidauk publika totál orsamentu tanba ekipa PNDS nasionál sei tetu hela antes publika sai. 

Antes ne’e, iha 20-25 jullu, ekipa tolu hosi PNDS RAEOA ne’ebé kompostu hosi Operasaun Polisia Suku (OPS), xefe suku no xefe aldeia, veteranu, konfisaun relijioza no juventude  dezloka ona ba aldeia alvu 18 hosi suku 18 iha sub-rejiaun haat (4) hodi halo sensibilizaun, no verifika ona ema kbiit laek 36 ne’ebé merese duni atu hetan apoiu ne’e.

Entretantu aldeia ne’ebé mak sai alvu iha programa “Uma Kbiit Laek” ne’e kada aldeia ida (1) hetan uma rua (2) ho benefisiáriu sira-nia naran bazea ba lista naran hosi kada sub-rejiaun ida-idak. 

Iha Sub-Rejiaun Pante Makasar, benefisiáriu iha Suku Costa iha aldeia Oétfo ne’e ho naran Ursula Coa no Zevarino Coa, iha Suku Nipani iha aldeia Sakato ho benefisiáriu naran Cecilia Coa no Abrão S. Falo, iha Suku Bobokase indika aldeia Fatubijae ho benefisiáriu nia naran Angelino Nono ho Judita Sequeira, iha Suku Lalisuk ne’e hili aldeia Banoco ho benefisiáriu nia naran Bendita Mambares no Maria Imaculada Sa’et.

Nune’e mós iha Suku Cunha iha aldeia Noeninen ho benefisiáriu naran Anastacia Mauno no Berta Quefi, iha Suku Lifau iha aldeia Tula-Ika ho benefisiáriu naran Luiza Mauno no Domingos Meni, iha Suku Taiboko iha aldeia Hau-Boni ho benefisiáriu naran Florentino Nebe no Jacinto Meni, no iha Suku Naimeco iha Aldeia Baqui ho benefisiáriu naran Joana Neno no Maria Eco.

Benefisáriu iha Sub-Rejiaun Oésilo iha Suku Bobometo iha aldeia Saben ho benefisiáriu naran Maria Pa’uf ho Leonardo Sako, iha Suku Usitasae iha Aldeia Sifin ho benefisiáriu naran Cornelio Eni ho Domingos Caunan no iha Suku Usitaqueno iha aldeia Nibin ho benefisiáriu Alberto Abi no Agustinho Elo.

Iha Sub-Rejiaun Pasabe, benefisiáriu iha Suku Abani iha aldeia Pasabe ne’e naran Domingos Vas no Zilbina L. Sila, iha Suku Malelat ne’e iha aldeia Malelat ho benefisiáriu naran Sabina Seco no Marta Lafo.

Benefisiáriu sira iha Sub-Rejiaun Nítibe ne’ebé hetan apoiu Uma Kbiit Laek ne’e, iha Suku Ban-Afi iha aldeia Neofmetan ne’e ho benefisiáriu naran Maria Seco ho Maria Salome Neno, iha Suku Lela-Ufe iha aldeia Bebo ne’e benefisiáriu naran Domingos Tefa ho Filomena Mala.

Iha Suku Usitaco iha aldeia Kuantua ho benefisiáriu naran Afonsu Babo ho Filomena Moco Oel, iha Suku Bene-Ufe iha aldeia Manan ho benefisiáriu ho naran Yohanes Oki ho Anita Ulan no iha Suku Suni-Ufe iha aldeia Oélnano’e ne’e benefisiáriu ho naran Gabriel Bani ho Ernesto Boco.

Xefe Suku Costa, Aleixo Abi, hato’o agradesimentu ba VIII Guvernu konstitusionál tanba tulun ona komunidade. Nia sujere atu programa ne’e iha kontinuasaun tanba komunidade barak iha área remota sei moris ho kondisaun ki’ak.

Entretantu totál aldeia suku iha Rejiaun Administrativa Espesiál Oé-Cusse Ambeno hamutuk suku 18 ho totál aldeia 63 no sub-rejiaun haat.

Jornalista : Abilio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here