Logotipu PNDS. Imajen/Espesiál

MANUFAHI, 28 jullu 2021 (TATOLI)—Xefe suku Fatucahi, postu administrativu Fatuberlio, munisípiu Manufahi, Moises Acaçio da Costa Pinto ‘Labalaba’, informa, iha abitante hamutuk tolu iha suku ne’e mak elejível hetan direitu ba ‘Uma Kbiit Laek’ hosi Programa Nasionál Dezenvolvimentu Suku (PNDS).

“Ita-nia suku iha aldeia ida naran Fatuk Mutin, bainhira ema hosi PNDS  sira mai verifika, iha inan na’in-tolu mak prenxe kritéria bele asesu  ba Uma Kbiit Laek no hirak ne’e ho kondisaun vulnerável,” Xefe suku hateten iha ninia rezidénsia, suku Fatucahi, kuarta ne’e.

Verikasaun ne’e bazeia ba levantamentu dadus hosi Ministériu Administrasaun Estatál (MAE).

“Ekipa tun ba verifika, halo levantamentu dadus no sira haree ho matan, tanba ne’e deside ho fuan bazeia ba kritériu iha uma kain hitu, maibé ita-nia inan na’in tolu ne’e maka elejível no merese duni atu hetan asisténsia,” nia akresenta.

Tuir líder komunitáriu ne’e, benefisáriu tolu ba programa ne’e hanesan idozu ho idade entre 60 to’ 70.

Entretantu, totál uma-kain iha suku Fatucahi hamutuk iha 618 no populasaun hamutuk 2.024, iha aldeia lima hanesan Fatubesi, Fatigue, Fatuk Mutin Fukiran no Kledik.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here