Médiku-sira kontinua hala’o teste swab ba komunidade iha Sentru Integradu Jestaun Kriza (SIJK) tersa, (27/07/21). Imajen Tatoli/António Gonçalves.

DILI, 27 jullu 2021 (TATOLI) –Tuir bulletín epidemiolójika, taxa insidénsia iha Timor-Leste (TL) iha semana ikus tun ba 2,4/100.000 populasaun, kompara ho semana kotuk.

“Taxa notifikasaun durante loron hitu, entre loron  19 no 25 jullu, tun ba 2,4/100.000 populasaun, kompara ho relatóriu semana kotuk 3,3 /100.000,” relatóriu bulletin epidemiolójika ne’ebé Tatoli asesu, tersa ne’e.

Notísia relevante:COVID-19, rekoperadu 33 no ativu 654

Kona-bá taxa insidénsia hosi munisípiu-sira, iha semana ikus, tuir dokumentu ne’e, rejista númeru kazu tun loron-loron  iha Díli no Viqueque iha 5,2/100.000 kompara ho semana hirak ne’ebé liu ona ho 8 no 2,3/100.000, Ermera  4,4/100.000 kompara ho semana kotuk 1,3/100.000, Baucau tun ba 1,2/100.000 kompara ho semana kotuk 6,2/100.000.

Hosi parte Laboratóriu Nasionál Saúde relata iha semana kotuk, 170 teste pozitivu hosi ema na’in 3.655 ne’ebé halo teste, ka responde ba 4,7% kompara semana kotuk 5,3%.

Relatóriu epidemiolójika hatudu katak, ema na’in 266.622 iha Timor-Leste, simu ona vasina doze dahuluk, ne’ebé reprezenta 35,3% hosi populasaun ho idade 18 ba leten.

To’o 24 jullu, ema liu 79.217 ka 10% kompleta ona doze daruak no 54% populasaun iha Díli ho idade 18 ba leten simu ona vasina.

Timor-Leste reporta to’o horseik 656 kazu pozitivu COVID-19, konfirmadu 10.354, mate 26 no 9.672 rekoperadu.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here