Profisionál saúde iha RAEOA tuir formasaun ba programa Lokál Área Monitoring Saúde Inan ho Oan. Imajen/Mídia RAEOA-ZEESM.

OÉ-CUSSE, 27 Jullu 2021 (TATOLI)—Atu redús kazu mortalidade no morbilidade saúde inan ho oan iha RAEOA, Profisionál Saúde kompostu hosi médiku no parteria na’in-24 partisipa iha formasaun kona-ba saúde inan ho oan atu aumenta sira-nia koñesmentu atendimentu ba pasiente sira.

Sekretáriu Rejionál Asuntu Saúde, Manuel da Costa, hateten formasaun liuhosi programa Lokál Área Monitoring Saúde Inan ho Oan (LAMSIO) ne’e hala’o durante loron rua hahú hosi segunda-tersa (26-27 juli 2021) hanesan refresing training ba pesoál saúde sira hodi atende inan isin-rua no labarik sira-ne’ebé foin moris.

Sekretáriu Rejionál Asuntu Saúde, Manuel da Costa. Imajen Tatoli/Abilio Elo Nini.

“Ita halo refresing training ba pesoál saúde sira, liu-liu médiku ho parteira sira atu hasa’e sira-nia koñesimentu oinsá bele identifika ba grupu alvu sira liu-liu ba inan isin-rua sira no labarik sira-ne’ebé foin moris, nune’e bele halo atendimentu di’ak liután iha ida-idak nia área servisu,” Manuel da Costa, informa ba Agência Tatoli iha nia servisu fatin, Sikluli, Suku Costa, Sub-Rejiaun Pante Makasar, tersa ne’e

Iha fatin hanesan, Formadora Odete Amado Martins, hateten durante hala’o nia kna’ar hanesan parteria profisionál iha maternidade Hospitál Referénsia Oé-Cusse, nia parte simu kazu barak transferénsia hosi postu saúde no sentru saúde kona-bá kazu inan ho oan barak ho kondisaun grave.

Tanba ne’e, nia husu autorizasaun hosi superiór saúde hodi hala’o formasaun loron rua (2) no foku liu ba programa inan ho oan ba profisionál saúde hamutuk 24, ho objetivu atu kapasita médiku no parteria sira atu hala’o servisu iha área rurál kona-bá oinsa halo monitorizasaun ba programa saúde inan ho oan.

“Iha Oé-Cusse, rejista númeru inan ho oan mate kada tinan aas kompara ho nasionál no munisipiu sira seluk. Ita halo formasaun ne’e, oinsá médiku no parteira sira bele halo monitorizasaun ba inan isin-rua no labarik sira iha sira-nia servisu fatin,” nia dehan.

Aleinde ne’e, nia informa, iha formasaun ne’e partisipante sira mós hetan matéria seluk mak hanesan tékniku halo relatóriu, oinsá analiza ba relatóriu rasik, oinsá halo gráfika, oinsá identifika inan isin-rua sira-ne’ebé moris ho risku, atu bele deteta sedu no halo transferénsia sedu ba Hospitál Referénsia, nune’e bele redús ona mortalidade inan ho bebé.

“Fasilidade iha sentru saúde no postu saúde sira mínimu, hanesan espsialista no ekipamentu, entaun ita tenke kapasita sira,” nia hateten.

Entretantu formasaun ne’e pasrtipa hosi médiku no parteira sira hamutuk 24 ne’ebé mai hosi sentru saúde no postu saúde sira iha sub-rejiaun Oésilo, Pasabe, Nitibe no sub-rejiaun Pante Makasar.

Jornalista : Abilio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here