Ekipa hosi ministériu sosializa Lei Protesaun Sivil ba entidade públiku iha Baucau, iha CCB Villa antiga, tersa (27/07). Imajen TATOLI/Natalino Belo

BAUCAU, 27 jullu 2021 (TATOLI)–Prezidente Autoridade Munisípiu (PAM) Baucau, Olívio Freitas ‘Bou Lesa’ konsidera presiza iha koordenasaun ne’ebé efetivu bainhira mosu dezastre naturál iha futuru.

“Espera ita bele kompriende halo serbisu di’ak liu, konjuntu, koordenadu, kooperativu, efetivu no estratéjiku hodi bele responde ba situasaun dezastre naturál ne’ebé sei akontese iha futuru mai,” PAM Baucau hateten iha Sentru Konvensaun Baucau (CCB, sigla portugés), Villa antiga, tersa ne’e.

Nune’e, autoridade munisipál ne’e apresia ho prezensa Sekretáriu Estadu Protesaun Sivil (SEPS), Joaquim Gusmão, hamutuk ho ekipa, hodi halo sosializasaun Lei Protesaun Sivil númeru 12/2020, loron 02 dezembru iha munisípiu Baucau.

Notísia relevante: SEPS kontinua sosializa Lei Protesaun Sivil iha Baucau

Nia nota katak dezastre naturál ne’ebé akontese iha loron 04 abríl foin lalais, afeta tebes ba populasaun Timor-Leste tomak inklui iha munisípiu Baucau, ne’ebé hosi uma komunidade hamutuk 209, uma hamutuk 63 mak hetan estragu maka’as no uma 146 hetan estragu kma’an iha postu administrativu neen.

Iha artigu 28 hosi Lei Protesaun Sivil, hatuur mós kona-ba kompeténsia PAM ne’ebé responsável ba rejionál no munisipál iha polítika protesaun sivil no akontesimentu asidente grave ka katástrofe, prevensaun, sokoru, asisténsia no rekuperasaun adekuadu.

Nune’e, atu toma responsabilidade ba protesaun sivil, tuir artigu 15 Dekretu-Lei númeru 3/2016, autoridade munisipál tenki iha proposta planu munisipál emerjénsia no protesaun sivil.

“Dalabarak vítima mos lahatene saida mak nia merese atu hetan no mós la hatene saida mak ita atu fó apoia, tanba ne’e halo ita iha konfuzaun, laran hakat la hakat, la’o la la’o, buat sira ne’e halo ema lahetan direitu ne’ebé loloos,” Bou Lesa akresenta.

Iha fatin hanesan, Xefe Suku Samalari, Rui Sertório Magno Sequeira, hateten, sosializasaun lei ne’e pozitivu tebes tanba nu’udar parte hosi koñesimentu hosi SEPS hodi hato’o ba autoridade munisipál, postu inklui líder komunitária.

“Ami sai hanesan ema ne’ebé edukadu hodi lori Lei Protesaun Sivil ida-ne’e ba ami-nia baze hodi implementa ba inan-aman sira, nune’e bele iha responsabilidade atu uza sasán ne’ebé iha ita-nia rai leten,” Rui hateten.

Entretantu, Lei Protesaun Sivil númeru 12/2020, loron 02 dezembru, hetan aprovasaun hosi Parlamentu Nasionál iha jullu 2020, promulga hosi Prezidente Repúblika iha novembru 2020, no tama ein vigor iha loron 01 janeiru 2021.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here