Administradór Munisípiu Covalima ho diretór MSSI Covalima distribui foos ba família vulneravel iha Suku Matai, Covalima, tersa (27/07/2021). Imajen Tatoli/Dok. Celestina Teles

COVALIMA, 27  jullu 2021 (TATOLI) –  Ministériu Solidariedade, Sosiál no Inkluzaun  (MSSI) hamutuk ho Administradór Covalima, Francisco de Andrade,  distribui foos ba família vulneravel na’in-99 iha Suku Matai, Postu Administrativu Maucatar, Munisípiu Covalima.

“Ami distribui foos iha Suku Matai, no sei  distribui mós ba iha suku seluk hodi atende família vulneravel sira,” Administradór Munisípiu Covalima, Francisco de Andrade, informa ba jornalista sira iha Suku Matai, tersa ne’e.

MSSI fó apoiu foos ba família vulneravel ne’e bazeia ba kapasidade hosi MSSI hodi distribui foos saka 99 iha suku Matai.

Diretór MSSI Covalima, Agapito Assis hateten, MSSI distribui foos ba família vulneravel ne’e servisu hamutuk ho Administradór Munisípiu tanba dadus sira-ne’e mak hosi xefe suku sira.

“Programa hosi MSSI ita bolu asisténsia  umanitária  ba vulneravel sira, hanesan ba ferik-katuas ne’ebé hela mesak laiha rendimentu no la ema ida ne’ebé tau matan,” Agapito Assis  haktuir.

Elvina Amaral nu’udar benefisiáriu  kontente hetan ona apoiu foos  hosi MSSI  atu bele aguenta ba nesesidade ai-han ba kada loron nian.

“Ha’u kontente Governu distribui foos ba ami. Se la’e, difisil tebes ba ami atu bele hetan foos ba konsumu,” Elvina hateten.

Jornalista       : Celestina Teles

Editór             : Francisco Simões

HAKEREK NO HATÁN

Please enter your comment!
Please enter your name here