Ekipa KTE foto hamutuk hafoin halo enkontru koordenasaun sistema identifikasaun únika, iha salaun Novo Turismo, tersa (27/07). Imajen TATOLI/Francisco Sony

DILI, 27 jullu 2021 (TATOLI)–Komisaun Téknika Eventuál (KTE) realiza workshop hodi avalia preparasaun implementasaun sistema identifikasaun únika hodi mellora liután serbisu.

Koordenadór KTE, Roberto Caetano de Sousa Vicente, hateten, komisaun ne’e harii bazeia ba Dekretu-Lei artigu 34, loron 30/2020 kona-ba kriasaun unidade misaun ba implementasaun programa, tanba ne’e nia parte husu ba ekipa atu halo esforsu másimu hodi hetan rezultadu di’ak.

“Atividade ne’e atu halo avaliasaun servisu, ne’ebé antes ne’e hala’o ona no prodúz ona planu implementasaun programa, tuir planu sistema identifikasaun únika, ne’ebé sei implementa molok tama tinan 2025,” Koordenadór informa iha Hotel Novo Turismo, Lecidere, tersa ne’e.

Notísia relevante: Governu prepara kondisaun implementa Sistema Identifikasaun Únika

Iha fatin hanesan, Pontu Vokal KTE, Fausto Gama, konsidera sorumutuk ne’e hanesan kontinuasaun hosi servisu antes ne’e, tanba ne’e ekipa kontinua servisu maka’as atu estabelese sistema dijitál ne’e ba timor-oan hotu no sidadaun rezidente sira.

“Ami kontinua prepara implementasaun reál hosi Planu Estratéjiku Integradu ba implementasaun sistema identifikadór dijitál únika, ne’ebé ohin ita haree ninia enkuadramentu institusionál ne’e funsiona oinsá, tanba komisaun estabelese ho rezolusaun Governu atu tau-matan ba prosesu implementasaun ne’e tomak,” nia dehan.

Nune’e, nia parte espera unidade misaun ne’e bele halo knaar ho di’ak hamutuk ho komisaun orientadór hodi haree ba finansiamentu.

“Presiza haree lei saida de’it maka bele prosesa lalais hodi implementa sistema ne’e, katak presiza iha Dekretu-Lei ida regula kona-ba sistema, tanba ne’e buat barak mak sei halo,” nia akresenta.

Tuir Pontu Vokál, dokumentu estratéjiku hodi gia implementasaun tenke tau atensaun másimu liuhosi atividade sira.

“Espera rezultadu diskusaun sira bele lori naroman hodi bele lori hakat ba oin,” nia hatutan.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here