Prosesu pagamentu subsídiu idozu iha munisípiu Baucau, kuarta (23/06). Imajen TATOLI/Natalino Belo

BAUCAU, 27 jullu 2021 (TATOLI)–Diretór Servisu Sentru Solidariedade Sosiál munisípiu Baucau, Guido Ricardo Belo, hateten kada loron servisu ne’e bele simu reklamante benefisiáriu subsísiu idozu no invalidez hamutuk na’in-10.

“Reklamante pur volta lima to’o 10 kada loron, depende ba kazu no dalaruma loron-ida bele to’o na’in-10,” Diretór hateten iha ninia knaar fatin, Villa nova, Baucau, tersa ne’e.

Nia esplika, reklamante mosu tanba hasoru problema hanesan naran laiha ka seidauk aprovadu, ne’ebé posibilidade lista aprovadu ona maibé konta error, naran no númeru kartaun eleitorál diferente inklui mudansa hela fatin.

Aleinde ne’e, dadus sira ne’ebé to’o iha munisípiu dalaruma iha lista aprovadu, maibé osan la transfere ba konta bankária, nune’e prejudika fali prosesu sira.

“Sira ne’ebé la aprovadu, signifika katak dokumentu presiza hadi’a hanesan kompleta rekezitu durante rejistrasaun, ezemplu kartaun no númeru eleitorál la han malu, ka dalaruma suku troka,” nia akresenta.

Nune’e, servisu munisipál tenta komunika ho Institutu Nasionákl Seguransa Sosiál (INSS) atu atualiza dadus, hodi nune’e bele hatan prekupasaun lista sira ne’ebé aprovadu, hodi bele foti desizaun rejeita ka suspende.

“Kazu sira ne’ebé akontese tenke halo reklamasaun hodi bele aprezenta fali ba nasionál, nune’e bele reativa fai benefisiáriu sira-nia konta hodi bele asesu,” nia hatutan.

Tinan ne’e, benefísiariu ba programa iha aumentu pur volta 300 resin, hosi totál antes ne’e 14.000 hosi postu neen.

Daudaun ne’e, pagamentu hala’o hela iha postu Baucau villa, Venilale, Quelicai no Baguia, enkuantu, pagamentu iha postu Vemasse no Laga finaliza ona.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here