Diretór Sentru Formasaun Grace for Development Timor-Leste (GFD), Joannes Gomes. Imajen Tatoli/Nelia Fernandes.

DILI, 27 jullu 2021 (TATOLI)—Diretór Sentru Formasaun Grace for Development Timor-Leste (GFD), Joannes Gomes, hateten iha 2021 ne’e sentru formasaun GFD aumenta tán área formasaun driver nian ba partisipante sira hodi kontribui redús infrasaun ba asidente tráfegu iha TimorLeste.

“Iha tinan 2021, ami aumenta tan área formasaun ba driver nian, ho objetivu atu bele kontribui ba Estadu liu-liu ba iha servisu tránzitu nian, atu bele redús infrasaun ba asidente tráfegu ne’ebé akontese iha Timor-Leste,” Joannes Gomes hateten ba Agência Tatoli iha nia knaar fatin, Vila Verde, Dili, tersa ne’e.

Iha formasaun driver nian ne’e, partisipante sira sei aprende konasafety driving no defensive driving ne’ebé aprende kona-bá oinsá maneira lori karreta no hatene regra tránzitu nian, atu nune’e labele mosu asidenta tráfegu.

Diretór ne’e hatutan, área formasaun driver nian ne’e hahú eziste iha fulan-janeiru 2021 ne’e maibé la konsege hala’o formasaun tanbá situasaun COVID-19 maibé iha fulan ida-ne’e, atividade ida-ne’e reativa fali.

“Formasaun ba área driver nian ami komesa ona, agora daudaun iha ona aula rua no hahú la’o semana ida ona,” nia hateten.

Totál partisipante ne’ebé partisipa iha área formasaun driver nian ne’e hamutuk na’in10 no hosi númeru ne’e, formandu sira mai hosi instituisaun privadu no Governu nian.

Sentru formasaun Grace For Development Timor-Leste (GFD) estabelese iha 28 Novembru 2013, ne’ebé funda hosi joven na’in-10, ho objetivu atu partisipa iha atividade sosiedade sivil nian liu-liu konabá atividade edukasaun formál, agrikultura, no saúde.

“Iha momentu ne’ebá atividades ne’e ami prioridade liu ba iha atividade edukasaun formál no ami hahú kedas ho formasaun ba joven sira, liu-liu kursu iha área Administrasaun, Inglés, Jornalizmu no Komputadór,” nia dehan.

Totál formandu iha tinan 2021 ne’e hamutuk 200-resin iha área formasaun komputadór, inglés, administrasaun, jornalizmu no driver. Enkuantu, totál funsionáriu no formadór iha Organizasaun Grace For Development Timor-Leste (GFD) hamutuk na’in-11.

Totál formandu hosi 2017 to’o 2019 ne’e hamutuk atus 100-resin no hosi númeru ne’e 50% hetan ona servisu iha meu komunikasaun sosiál sira iha Timor-Leste mak hanesan Televizaun Edukasaun (TVE), GMNTV, Rádio Televisaun Timor-Leste (RTTL), Gardamór-TV, Rádiu Komunidade, instituisaun Governu no kompañia privadu sira.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here