Prezidente Tribunál Rekursu, Deolindo dos Santos. Imajen Tatoli/Dok.

DILI, 27 jullu 2021 (TATOLI)—Prezidente Tribunál Rekursu (PTR), Deolindo dos Santos, informa hahú 01 agostu to’o 15 setembru ne’e Tribunál Rekursu tama iha férias judisiál maibé Tribunál kontinua funsiona parsialmente.

“Ita sei funsiona parsialmente tanba ita tama ba feriadu judisiál. Signifika iha tempu ida-ne’e, kada juis no ofisiál sira iha direitu atu foti férias ba loron 25 nia-laran,” Prezidente Tribunál Rekursu hateten ba jornalista sira, iha Palásiu Prezidénsiál Nicolau Lobato, Bairru Pite, Dili, tersa ne’e.

Bainhira juis, prokuradór, ofisiál no defensór sira foti férias entaun Tribunál Rekursu ne’e foti de’it mak prosesu ne’ebé urjente tama iha Tribunál ho forma ne’ebé mínimu.

Iha enkontru ne’e, Xefe Estadu hateten mezmu feriadu maibé tenke asegura nafatin servisu urjente sira, nune’e sidadaun ne’ebé presiza justisa karik tenke fó atendementu lalais hosi Tribunál sira.

“Ha’u dehan ida-ne’e ba Xefe Estadu katak kestaun ne’e ami sei asegura nafatin tanba mapa férias juis sira-nian ne’e Konsellu mak aprova, katak mezmu férias maibé servisu urjente kontinua la’o nafatin,” nia dehan.

Jornalista : Osória Marques

Editór       : Cancio Ximenes

 

HAKEREK NO HATÁN

Please enter your comment!
Please enter your name here