Estudante Eskola Bázika Katólika Santa Ursula Baucau partisipa ezersísiu matéria, segunda (05/07). Imajen TATOLI/Natalino Belo

BAUCAU, 27 jullu 2021 (TATOLI)–Diretór Servisu Edukasaun munisipál Baucau, Augusto Hornai Ximenes, orienta ona profesór sira liuhosi diretór eskola, atu aproveita tempu ho di’ak durante aula prezensiál.

“Ita orienta Diretiva Eskola atu uza tempu ho efetivu hodi rekupera aula prezensiál ne’ebé lakon durante fulan haat no kontinua orienta kumpre protokolu saúde, tanba maski Baucau laiha ona serka sanitária, maibé transmisaun COVID-19 sei kontinua rejista loron-loron, tanba ne’e mak tenke ita fó atensaun nafatin,” Diretór informa ba Agência TATOLI iha ninia knaar fatin, tersa ne’e.

Molok diploma ministeriál númeru 38/2021 fó sai, kona-ba reativa ensinu aprendizajen iha Baucau no Dili ba rezime prezensiál, Servisu Edukasaun munisipál ezekuta uluk orientasaun téknika hosi Diresaun Jerál Ensinu Ministériu Edukasaun Juventude no Desportu (MEJD) atu hahú halo preparasaun, nune’e iha loron 12 jullu orienta Diretiva Eskola sira atu halo preparasaun téknika ligadu ho programa ambiente moos iha eskola inklui orienta atu estudante 25 ba leten tenke fahe ba turnu hodi bele iha distánsia fíziku hodi kumpre protokolu saúde.

Nune’e, iha loron 15 jullu, Servisu Edukasaun munisipál hetan despaisu ministeriál númeru 38 hodi autoriza reativa prosesu aprendizajen iha Baucau, tanba ne’e parte diresaun nu’udar implementadór, fó orientasaun no parte eskola fó sai anúnsiu liuhosi meiu komunikasaun hanesan avizu iha Igreja no via grupu WhatsApp ba estudante hodi tama eskola.

Aleinde ne’e, Servisu Edukasaun munisipál iha kompeténsia atu define tipu ezame períodu dahuluk, nune’e orienta ona eskola sira atu halo ezame tipu avaliasaun liuhosi maneira ne’ebé eskola sira uza hanesan ezame sumativu hodi bele hetan nota.

“Eskola balun, hafoin reativa aula loron hirak ne’e sira hahú ezame ona, enkuantu eskola privadu iha posibilidade uza maneira ezame online maibé barak liu mak labele,” nia akresenta.

Setembru, ezame períodu daruak iha Baucau

Servisu Edukasaun munisipál husu mós ba Diretiva Eskola atu aproveita kalendáriu eskolár atu prepara semana rua ka tolu halo rezume matéria períodu daruak ne’ebé profesór sira distribui ona, nune’e bainhira alunu sira iha dúvida, bele rezolve molok husu autorizasaun hosi MEJD atu hala’o ezame períodu daruak.

“Maioria Diretiva Eskola husu atu ministériu fó tempu atu eskola sira halo revizaun ba matéria, tanba ne’e inísiu setembru mak halo ezame períodu daruak,” nia hatutan.

Liuhosi enkontru, Augostu husu opiniaun Diretiva Eskola sira kona-ba ba ezame nasionál tanba Baucau lakon fulan-haat aula prezensiál, nune’e parte ministériu bele tetu atu halo kalendáriu ba prosesu ezame períodu espesiál ba ezame finál 9o ano Ensinu Báziku no 12o Ensinu Sekundáriu Jerál no Tékniku Vokasionál.

Tuir Diretór Servisu Edukasaun Baucau, opiniaun hosi Diretiva Eskola sira, bainhira laiha mudansa ba kalendáriu, maka grau kona-ba pontu ezame labele hanesan ho munisípiu seluk tanba prosesu aprendizajen la’o normál, enkuantu Baucau foin reativa aula prezensiál hafoin termina serka sanitária.

Tanba ne’e, parte eskola iha Baucau hasoru difikuldade ein termu matéria ba estudante, liu-liu ba siénsia naturál, tanba estudante sira labele akapta ho di’ak tanba durante ne’e distribui de’it matéria sein esplikasaun hosi profesór sira.

“Prosesu aprendizajen ita hetan impaktu maka’as tanba fulan-haat laiha aula, bainhira ita sura ba kalendáriu aprendizajen, ita lakon períodu ida,” Augosto hateten.

Totál eskola iha munisípiu Baucau hosi pre-eskolár to’o ensinu sekundáriu tékniku vokasionál hamutuk 243, kompostu hosi pre-eskolár 30, ensinu báziku sekundáriu hamutuk 185, ensinu sekundáriu jerál 23 no tékniku vokasionál hamutuk lima.

Enkuantu, totál estudante hahú hosi ensinu pre-eskolar to’o ensinu sekundáriu jerál no tékniku vokasionál hamutuk estudante 41.255 no profesór 2.200 resin.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here