Imajen Espesiál.

DILI, 27 jullu 2021 (TATOLI)—Bankada Congresso Nacional de Reconstrução de Timorense (CNRT) husu VIII Governu Konstitusionál tenke taka fronteira ho sériu, nune’e evita variante foun Delta COVID-19 alastra mai territóriu Timor-Leste.

“Bankada CNRT rekomenda ba Governu atu hapara estensaun ba Estadu Emerjénsia maibé kontinua aplika pontu sira hanesan kontinua taka fronteira Timor-Leste nian, no tenke implementa pontu ida-ne’e ho sériu atu evita variante foun Delta tama iha Timor-Leste,” Reprezentante Bankada CNRT, Deputada Maria Terezinha Viegas, levanta liuhosi estensaun estadu emerjénsia ba dala-XVI, iha uma fukun, tersa ne’e.

Bankada CNRT husu Governu tenke taka metin fronteira terrestre, aéreu, no marítima, nune’e evita risku importa variante Delta COVID-19 mai iha Timor-Leste.

CNRT husu aselera ezekusaun ba Orsamentu Jerál Estadu 2021 ho montante biliaun $2.1 ne’ebé Parlamentu Nasionál aprova iha tinan ida-ne’e.

Opozisaun ne’e lakohi rona katak orsamentu ida-ne’e atu haruka fila-fali ba kofre Estadu, tanba Governu husu orsamentu ida-ne’e bazea ba programa no Bankada CNRT ezije atu Governu implementa programa sira-ne’e ba povu nia moris di’ak.

Bankada CNRT ezije aselera pagamentu ba liña frente hanesan membru PNTL no F-FDTL, Guarda Prizaun, médiku sira, enfermeiru, jornalista sira no ajente sira-ne’ebé servisu direta iha luta hasoru COVID-19.

Nune’e mós husu aselera pagamentu ba otél sira-ne’ebé uza ba kuarentena no izolamentu no aselera pagamentu ba emprezáriu Timor-oan sira-ne’ebé fornese servisu catering ba fatin izolamentu no kuarentena.

Reprezentante Bankada CNRT ne’e husu Governu aselera pagamentu ba emprezáriu Timor-oan sira-ne’ebé implementa ona programa cesta bázika, tanba oras ne’e kompañia lokál balun moris iha situasaun tusan nia laran.

Governu atu sosializa mós vantajen no risku vasina nian ho di’ak atu konvense povu hodi simu vasina, nune’e bele atinje lalais objetivu ba herd immunity ka imunidade rebanho.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here