Na'in ba empreza Matrrozec Gares Unip Lda, Marlinda de Jesus Barros 'Lili'. Imajen/FB

DILI, 27 jullu 2021 (TATOLI)—Mundu virtuál ohin loron lori dezafiu foun ba emar sira, ne’ebé utiliza ona plataforma mídia sosiál. Maibé hosi plataforma foun ne’e lori mós vantajen boot ba utilizadór sira.

Hatene uza, hatene aproveita. Ida ne’e maka sai baze ba eis Kabu FALINTIL-Forsa Defeza Timor-Leste (F-FDTL), Marlinda de Jesus Barros, ho idade 40.

Ho sasadik no sasidik oioin, Marlinda ho naran estimadu ‘Lili’ deside husik hela Kuartel Jenerál F-FDTL iha tinan 2014 hodi fila ba vida sivil. Ho vida foun hanesan ema sivil, Lili nu’udar feto dahuluk ne’ebé rekruta iha F-FDTL iha tinan 2002 ho diviza Kabu, buka aprende negósiu kiik kulinária nian.

Lili koko negósiu kulinária ho ‘modal nekad’ ka motto ‘fiar-an la’o ba oin’.  No buka aprende hosi aprezentasaun kulinária iha Youtube, hodi inspira nia bele sai susesu harii negósiu kulinária ne’e.

“Motiva ha’u halo vida negósiu foku liu ba kulinária tanba iha tinan tolu liubá, ha’u haree negósiu via online barak no ha’u gosta haree programa sira hosi Youtube kona-ba hahan, liliu hahán Indonézia nian, loron-loron ha’u sempre haree programa kulinária iha Youtube no televizaun, no hosi ida-ne’e maka motiva ha’u hodi deside halo negósiu,” Lili haktuir bainhira dada-lia ho Agência TATOLI, iha ninia hela fatin, iha Manleuana, segunda (27/07).

Ai-han lokál hosi empreza Matrrozec Gares Unip Lda. Imajen/FB

Nune’e, nia hahú halo negósiu kulináriu no apreveita plataforma rede sosiál to’o ohin loron, hodi fa’an ai-han lokál sira ne’ebé tein tasak ona hodi tau iha Facebook.

Dezde tinan 2018, Lili uza nia Facebook privadu hodi fa’an kulinária oioin, hanesan sate na’an karau, na’an fahi, ikan tunu, katupa, etu-foos lokál no modo oioin.

Ema barak entusiazmu no hameno hahan iha nia. Balun hameno individuu no balun em nome empreza. Ho ida-ne’e motiva liután inan-feton hosi Lautém, ne’ebé moris iha loron 10 jullu 1981, estabelese nia empreza ‘Matrrozec Gares Unip Lda iha tinan 2019.

Foku dezenvolve empreza

Inan hosi oan na’in-lima, hanesan Priscilia Bakhita Barros, Jessie Sophia Barros, Laninha Mayita Barros, Duke Troy Barros, no Ronald Kubala Barros, oras ne’e foku dezenvolve nia empreza no fó serbisu ba nia feto maluk hamutuk na’in-10, ne’ebé na’in-rua permanente no na’in-ualu kazuál.

“Produtu sira ne’ebé ha’u uza iha ha’u-nia negoóiu kulináriu, orientadu liu ba produtu lokál, katak hahán sira ne’e ha’u nunka uza hahán hanesan ayam potong no sosis, maibé ha’u uza liu mak produtu lokál hanesan foos-lokál, manu lokál inklui produtu sira seluk hanesan fehuk, aifarina no seluktan,” nia haktuir.

Ho nia sakrifísiu, badinas, no liman-badaen, lori Organizasaun Mundiál Saúde (OMS), Munisteriu Saúde, ofísiu Organizasaun Nasaun Unida (ONU) iha Dili inklui entidade Estadu seluk, hateke kona Lili nia empreza no halo kontratu hodi fonese hahán ba sira-nia atividade, ne’ebé la sura ho ema individuu sira ne’ebé ida-idak hameno loron ba loron.

“Ha’u kontente no agradese tanba loron ba loron ema kontinua hameno hahán iha ha’u. Hahán fresku no orgániku maka sai hau-nia oferta espesiál ba konsumidór sira,” nia tenik.

Maski nune’e, nia rekoñse, difikuldade sempre hasoru, satán nu’udar feto ida loke negósiu no la simu ajuda hosi sé de’it.

“Ha’u la simu ajuda ruma no ha’u rasik mós laiha esperiénsia ba negósiu no hahán, maibé ha’u haree hosi Youtube no televizaun nune’e motiva ha’u atu realiza negósiu ne’e,” nia hatutan.

Nia agradese ba Governu tanba iha situasaun COVID-19, nafatin hetan fiar hodi tein hahán ba ema sira iha kuarentena.

“Loos duni katak ho situasaun COVID-19, empreza barak mak la hetan lukru, maibé ha’u pesoál agradese tebes tanba ha’u hetan fiar iha desde tinan 2020, bainhira Governu deklara Estadu Emerjénsiam hahú hetan kontaktu hosi Ministériu Turizmu, Komérsiu no Indústria hodi ami tein ba ema sira iha kuarentena, maibé atividade ne’e konsege paradu no hahú fali iha fin tinan 2020 to’o mai 2021,” nia agradese.

Osan ne’ebé nia hetan, nia haree ba nesesidade ninia oan, família no selu funsionáriu.

Daudaun ne’e, Lili inisia restaurante no kafetaria ida iha Lautém, ne’ebé iha tempu badak sei loke ba públiku.

Aprende disiplina tempu hosi vida militár

Biban ne’e, nia konta oitoan ninia esperiénsia durante vida militár, buat ne’ebé pozitivu hodi Lili banati tuir to’o mai agora maka disiplina no responsabilidade. Tanba ne’e aktu ida-ne’e nia kaer metin nafatin bainhira ema hameno hahán, nia sempre prontu no lori hahán tuir tempu.

“Vida militár la’ós fasil ba feto, depois hanoin ne’ebé sei kloot entre ita-nia parseiru ho ita, ne’ebé difikulta ita-nia karreira, Timór la hanesan ho malae, malae ninia hanoin luan liu maibé Timór mane barak la gosta sira-nia parseiru atu servisu iha vida militár, ne’ebé atividade ne’e tenke on time, disiplina no tenke kumpre loos de’it, hosi buat sira ne’e mak ha’u deside reziga-an kuaze tinan hitu ona,” Lili dehan.

Marlinda de Jesus Barros, iha vida militar. Imajen/FB

Maski nune’e, Merlina agradese tanba vida militár nia vantajen maka forma nia sai ema ne’ebé disiplina no responsabilidade, liliu disiplina iha tempu. Nune’e iha vida sivil mós nafatin aplika ida ne’e.

“Buat ida importante no ha’u banati tuir hosi vida militár mak disiplina ba tempu, tanba ha’u-nia parseiru barak sempre enkomenda hahán hosi ha’u hanesan ONG, ONU, Governu no eventu privadu sira, ha’u-nia savi ne’ebé ha’u kaer metin mak tenke on time, ne’e hanesan ema eis militár ida, ha’u aplika fali iha vida sivil, liliu mak disiplina no responsabilidade,” Marlinda de Jesus salienta.

Nune’e, Lili hameno ba feto maluk sira katak, labele tauk atu hambriik mesak no tenke barani hakat, liliu iha vida negósiu.

“Mensajen ba feto maluk sira ne’ebé mak iha uma, ha’u hanoin katak daudaun ita enfrenta COVID-19 iha mundu no Timor-Leste, maibé ita labele lakon vontade, dala ruma ita iha uma de’it ita bele aproveita hosi rede sosiál, bele hala’o negósiu ruma hodi ajuda ekonomia família,” nia enkoraja.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here