Diretór KJP-Arkidioseze Dili, Padre Demétrio da Conceição Xavier, troka nota entendimentu ho Diretora Nasionál WVTL, Migena Shulla, iha salaun Ekleziástika, Lecidere, Dili, segunda (23/07). Imajen Tatoli/Francisco Sony

DILI, 26 jullu 2021 (TATOLI)-World Vision Timor-Leste (WVTL), segunda ne’e, asina akordu koordenasaun Komisaun Justisa no Pás  (KJP) Arkidioseze Dili kona-ba protesaun ba labarik.

Diretora Nasionál WVTL, Miguena Shulla hateten, objetivu hosi asina akordu koordenasaun ho Arkidioseze Dili tanba WVTL hanesan kristaun ida, ne’ebé servisu iha nasaun 100-resin iha mundu tomak, inklui Timor-Leste hodi fó asisténsia pás nian ba labarik sira.

“Kualkér fatin ne’ebé Word Vision servisu ba igreja mak nu’udár parseiru estratéjiku. Entaun ho asina akordu koordenasaun ho igreja ne’e oinsá ita servisu hamutuk fó hanoin inan-aman hodi proteje labarik no labele hamosu violénsia oin-oin hasoru labarik sira,”  Miguena Shulla hateten ba jornalista-sira hafoin asina nota koordenasaun ho Arkidioseze Dili, iha salaun Ekleziástika, Lecidere, Dili, segunda ne’e.

WVTL hili igreja halo parseria tanba igreja eziste nanis tiha ona iha fatin-fatin sira mak Word Vision tama, no igreja sei kontinua nafatin servisu ho komunidade bainhira Word Vision ramata nia servisu, tanba ne’e fiar katak servisu hamutuk ida ne’e, bele la’o di’ak, tanba igreja mak hakbesik liu ba komunidade hodi hatene komunidade ninia nesesidade

“Iha akordu ohin World Vision tanba ami vizita ona iha fatin barak katak fatin balu laiha atendimentu báziku hanesan fasilidade saúde, maibé igreja iha, entaun World Vision fiar katak iha fatin ne’ebé kiak eziste la’ós tanba kiak ba hahán, saúde de’it, maibé mukit mós ba espiritualidade,” nia dehan.

Liuhosi asina nota entendimentu ne’e World Vision sei fó apoiu téknika ba igreja hodi suporta iha parte rekursu umanu, saida mak WVTL hatene bele fó apoiu, ezemplu hanesan selebrasaun família katak oinsá família bele tau matan di’ak ba sira-nia família sira, ho domin ne’ebé nakonu.

Apoiu seluk mak WVTL bele fó finansiamentu, maibé finanseiru refere la espesífiku tanba WVTL fleksivel depende ba nesesidade iha koko atu ajusta.

Diretór KJP-Arkidioseze  Dili, Padre Demétrio da Concição Xavier hateten, sira-nia parte halo parseria ho WVTL tanba durante sira servisu iha Komisaun Justisa Pás ne’e pakote ida kona-ba dame nian, no pakote ida ne’e sira tun ba sosiedade liuliu área sira ne’ebé konflitu ka violénsia akontese makaas.

Nia hatutan, sira foti programa protesaun labarik no selebrasaun família tanba sosiedade ne’e nia hun ne’e mak família, bainhira família di’ak sei forma mós sosiedade ne’ebé di’ak. Tanba ne’e liuhosi asina nota entendimentu ne’e parte Arkidioseze nian sei tuir etapa, ohin asina ona akordu tuir fali mai sei tuir ho ekipa sira mak foin tun ba halo survey ba fatin sira ne’ebé atu implementa programa mak ekipa tun ba halo formasaun ba uma-kain sira.

“Hosi formasaun kona-ba protesaun labarik ne’e mak oinsá inan-aman halo tratamentu di’ak ba labarik, ita halo programa ne’e tanba maske durante ne’e NGO barak mak hala’o protesaun labarik maibé sira iha área rurál sira ne’e barak mak seidauk asesu didi’ak ho direitu labarik nian,” nia dehan.

Programa protesaun labarik ne’e sei hala’o fatin rua iha Munisípiu Aileu, hanesan, Lequidoe no Remexiu. Tanba kontratu ba programa refere ba tinan ida de’it ne’ebé sei foku liu ba fatin ne’ebé presiza liu.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here