Administrasaun Munisípiu Aileu. Imajen Tatoli/Rafy Belo

DILI, 26 jullu 2021 (TATOLI)-Supervizór Eletrisidade de Timor-Leste, Empreza Públika (EDTL, E.P) Munisípiu Aileu, Jorge Felix da Costa Leite,  informa, komunidade uma-kain 3.640 iha Aileu seidauk asesu eletrisidade.

“Totál uma-kain iha Munisípiu Aileu hamutuk 10.487, hosi númeru ne’e uma-kain 6.883 mak asesu ona ba liña eletrisidade no uma-kain 3.640 mak seidauk asesu ba liña eletrisidade,” Jorge Felix da Costa Leite  informa ba Agência Tatoli liuhosi telefónika, segunda ne’e.

Nia hatutan, komunidade ne’ebé seidauk asesu ba liña eletrisidade ne’e la’ós tanba sira hela dook hosi villa, maibé tanba realidade liña eletrisidade mak seidauk to’o duni komunidade nia hela-fatin.  Tanba ne’e, komunidade ne’ebé seidauk asesu ba liña eletrisidade iha tempu kalan balu ne’ebé iha kbiit  sosa solar panel uza, maibé sira ne’ebé laiha kbiit iha tempu kalan sira kontinua uza lampu tradisionál hanesan sunu kami no seluk tan.

Munisípiu Aileu rasik iha Postu Administrativu haat hanesan, Aileu Vila, Liquidoe, Remexio, no Laulara, hosi Postu Administrativu haat ne’e iha Suku 33 no Aldeia 139.

“Entaun Postu Administrativu haat,  Suku 33, Aldeia 139, agora daudaun seidauk asesu ba eletrisidade ne’e hela suku, haat, aldeia 40, uma-kain mak 3.640,” nia hateten.

Supervizór EDTL Aileu ne’e hatutan, ba komunidade ne’ebé seidauk ba asesu liña eletrisidade, ba tinan ida ne’e, Aileu la tama ba lista dada liña eletrisidade, maibé tinan ida ne’e EDTL rasik sei dada liña eletrisidade ba Suku Tohumeta, Postu Administrativu Laulara nian, tanba antes ne’e ai-riin ba liña eletrisidade iha hotu ona.

“Sira seluk ne’ebé seidauk asesu ne’e ba tinan ida ne’e mak laiha, maibé tama hotu ona planu  no espera tinan oin mai ne’e komunidade ne’ebé seidauk asesu ba eletrisidade sira bele asesu tanba planu VIII Governu nian katak antes mandatu ramata munisípiu 12 komunidade hotu-hotu bele asesu on aba eletrisidade,” nia hatutan.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here