Benefisiáriu ba osan idozu hosi aldeia Watulilo, suku Uani Uma, postu Uatucarbau, munisípiu Viqueque, Joaquim Gomes. Iamjen Tatoli/ Vitorino Lopes da Costa.

VIQUEUQUE, 26 jullu 2021 (TATOLI)—Benefisiáriu ba osan idozu hosi aldeia Watulilo, suku Uani Uma, postu Uatucarbau, munisípiu Viqueque, Joaquim Gomes, triste Governu selu la kompletu, nune’e husu ba Ministériu Solidariedade Sosiál no Inkluzaun (MSSI) atu halo klarifikasaun.

Benefisiáriu ne’e konta katak, tuir-loloos nia merese atu simu tomak direitu idozu nian ba tinan 2020, tanba naran iha lista, maibé osan mak la tama ba ninia númeru konta bankária.

Notísia relevante:Idózus no invalidés 406 iha Caraubalu simu ona subsídiu

Alende ne’e, Joaquim Gomes mós naran sai nafatin iha lista benefisiáriu tinan 2021,  no osan tama duni konta bankária maibé ba fulan neen nian de’it no foti ona iha 19 jullu.

“Tanba ne’e mak ha’u sente triste bo’ot ho atendementu ba idozu. Ha’u husu Governu atu halo  klarifikasaun,”Joaquim Gomes hateten ba jornalista Agência Tatoli liuhosi telefónika, segunda ne’e.

Nia halo kalkulasaun katak, tuir loloos simu direitu ba tinan rua (2020-2021) hamutuk $540, maibé realidade simu la kompletu.

Hatán ba preokupasaun ne’e, Diretór Sentru Solidariedade Sosiál no Inkluzaun munisípiu Viqueque, Geraldo de Carvalho hateten, bainhira benefisiáriu la simu direitu hosi 2020 tomak, presiza halo deklarasaun hosi pontu fokál seguransa sosiál munisípiu Viqueque nian.

“Dala-ruma benefisiáriu Joaquim Gomes tama ba prosesamentu suspensaun, tanba ne’e mak iha tinan 2020 nia la simu. Maibé prosesu ne’e la’o hela, nune’e husu ba Joaquim tenke mai konfirma direta ba tékniku pontu fokál sosiál nian. se la’e nia naran la sai nafatin,” Geraldo de Carvalho hateten.

Tuir nia, situasaun sira hanesan ne’e la akontese de’it ba Joaquim Gomes, maibé akontese mós ba ema barak, importante maka tenke halo reklamasaun hodi bele re-ativa fila-fali atu bele simu kompletu iha fulan dezembru tinan ne’e.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here