Sekretáriu Estadu Proesaun Sivíl (SEPS), Joaquim José Gusmão dos Reis ho ekipa halo sensibilizasaun kona-bá lei protesaun sivíl iha munisípiu Viqueque, segunda (26/07/21). Imajen Tatoli/Vitorino Lopes da Costa.

VIQUEQUE, 26 Jullu 2021 (TATOLI)—Sekretáriu Estadu Proesaun Sivíl (SEPS), Joaquim José Gusmão dos Reis ho ekipa kontinua halo sensibilizasaun kona-bá lei protesaun sivíl númeru 12/2020, 2 dezembru  iha munisípiu Viqueque.

“Lei protesaun sivíl importante teb-tebes tanba kompleta ona pilár tolu seguransa nasionál Timor-Leste,” Joaquim José Gusmão dos Reis hateten ba jornalista Agência Tatoli, iha salaun munisípiu Viqueque, Beloi, segunda ne’e.

Notísia relevante:SEPS apoia ona vítima dezastre naturál iha Uma-Wa’in Leten

Pilár tolu seguransa nasionál ne’e mak hanesan, seguransa interna maka Polísia Nasionál Timor-Leste (PNTL), seguransa esterna FALINTIL Forsa Defeza Timor-Leste (F-FDTL) no Protesaun Sivíl rasik.

Lei ne’e hetan aprovasaun iha 21 juñu 2020 iha Parlamentu Nasionál (PN) no Prezidente Repúblika (PR) promulga iha 30 novembru 2020.

Lei ne’e tama vigór iha 01 janeiru 2021, lei Protesaun Sivil ne’e perioridade ba Bombeiru, Jestaun Risku dezastre, seguransa Sivíl no Protesaun sivil ne’eb’e konsiste hosi artigu 59o, iha kapitulu hitu ne’ebé  atu regula papél protesaun sivíl iha Timor-Leste.

Iha fatin hanesan, adiministradór Munisípiu Viqueque, Januário Soares, apresia ho inisiativa Sekretáriu Estadu Proesaun Sivíl (SEPS) ne’ebé hakat to’o iha munisípiu ne’e hodi halo sosializasaun ba lei protesaun sivil.

Partisipa iha sensibilizasaun durante loron ida ne’e mai hosi komandante PNTL Munisípiu Viqueque, diretór munisípiu-sira, membru protesaun sivíl, membru Bombeiru, adiministradór Viqueque Villa, no autoridade suku-sira.

Jornalista: Vitorino Lopes da Costa

Editór: Francisco Simões

HAKEREK NO HATÁN

Please enter your comment!
Please enter your name here