Edifísiu Sentru saúde Cailaco (26/07). Imajen Tatoli/Sérgio da Cruz.

BOBONARO, 26 jullu 2021 (TATOLI)—Hahú hosi janeiru to’o juñu tinan ne’e, sentru saúde Cailaco, munisípiu Bobonaro, rejista kazu Infesaun Respiratóriu Alta (IRA sígla portugés), hamutuk na’in 2.273.

Númeru ne’e, rekolla hosi relatóriu mensál, janeiru rejista pasiente 433, fevreiru 470, marsu 310, abríl 310, maiu 312 no juñu 262, no tuir kedan ida-ne’e maka diareia rejistadu 523.

Notísia relevante:Uma Kain 12.323 iha Cailaco Seidauk Asesu ba Eletrisidade

“Moras ne’e, rejista aas kauza hosi klíma, tanba tempu agora rai rahun makás. Entaun, aktividade komunkdade sempre kontaktu direta ho sasán foer,” Xefe sentru saúde Cailaco, Delfin Bere Cau, informa ba jornalista Agência Tatoli, iha kna’ar fatin, segunda ne’e.

Pesoál saúde kontinua esforsu hodi halo sosializaun liuhosi fahe informasaun ba komunidade, atu muda attitude hodi  bele  prevene-an ho maneira kuidadu saúde públika no pratika ijiéne ambientál hanesan hamoos uma ninin, tenke uza masker no seluk tan.

“Ha’u nia mensajen maka prevensaun ne’e importante tebes, nune’e bele evita moras ne’ebé sirkula iha ita nia área,” nia sujere.

Sentru saúde Cailaco iha postu saúde neen, maibé iha postu saúde rua mak sei iha hela faze reabilitasaun.

Durante periúdu COVID-19, atendimentu saúde kontinua la’o normál no kumpre nafatin protokolu Oraganizsaun Mundiál Saúde (OMS), hanesan fase liman ho sabaun antes mai konsulta, uza máskara no mantein distansiamentu féziku.

Sentru saúde Cailaco iha médiku na’in-hitu, tékniku aliadu na’in 12, enfermeiru na’in 12 no parteira na’in-hitu.

Postu administrativu Cailaco iha suku ualu hanesan, Manapa, Goulolo, Meligo, Da-udu, Atudara, Raiheu, Purugua no Genulai ho nia totál populasaun 10.405.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here