Sekretariu Estadu Komunikasaun Sosiál, Merício Juvinal dos Reis ‘Akara’. Imajen TATOLI/Egas Cristóvão

DILI, 26 jullu 2021(TATOLI)–Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, apresia ho projetu Konsultóriu Lian ba Jornalista (CLJ, sigla portugés) tanba nota katak notísia portugés ne’ebé hakerek hosi notísia timo-oan sira iha progresu di’ak.

“Ohin  formadór no revizór sira hateten mai ha’u katak notísia lian portugés iha Agência TATOLI, I.P, Rádiu Televizaun Timor-Leste, Empreza Públika (RTTL, E.P) no mídia nasionál seluk iha erru 3,4% de’it kompara ho antes ne’e,  maibé ha’u kontente tanba haree kuaze 95% notísia lian portugés di’ak los, orgullu ba ita timor-oan tanba bele domina hakerek lalais no perfeitu,” Sekretáriu Estadu hateten hafoin halo vizita kortezia ba edifísiu CLJ, Audian, segunda ne’e.

Notísia relevante: SEKOMS no Embaixada Portugal Asina Akordu Prolonga Projetu CLJ

Governante ne’e apresia ba kooperasaun entre Governu Timor-Leste ho Embaixada Portugal no Instututo Camões, nune’e, nia parte komprometidu no prontu kontinua kooperasaun ne’e atu fasilita jornalista sira hakarek notísia lian portugés ho di’ak liután, ho padraun jornalístiku.

“La’ós domina de’it lian atu ko’alia, maibé domina mós tekniku jornalizmu, ne’ebé rua ne’e tenke la’o hamutuk, kuandu domina de’it lian, difikulta mós funsionamentu loron-loron nian,” nia akresenta.

Iha fatin hanesan, Embaixadór Portugal iha Timor-Leste, Pedro Machado Viera, hateten, vizita SEKOMS ne’e atu haree kondisaun servisu, fasilidade no progresu projetu kooperasaun CLJ ba jornalista.

“Ohin formadór no revizór sira relata ona rezultadu projetu CLJ iha pasu pozitivu tebes, tanba ne’e Sekretáriu Estadu husu atu kontinua tan programa ne’e,” nia hatutan.

Biban ne’e, Diplomata ne’e agradese ba kolaborasaun SEKOMS, nune’e bele kapasita jornalista sira ho di’ak no kontribui ba prosesu dezenvolvimentu nasionál iha rai-laran.

Iha loron 28 maiu 2020, Governu liuhosi SEKOMS no Instituto Camões liuhosi Embaixada Portugal selebra akordu ba prolongasaun projetu CLJ.

Benefiáriu ba projetu CLJ desde hahú iha 2016 to’o dezembru 2019 hamutuk 190 no hosi númeru ne’e na’in-40 hanesan profisionál sira ne’ebé servisu iha Governu no na’in-150 hanesan jornalista.

Enkuantu, jornalista sira ne’ebé iha ona melloramentu ba lian portugés hosi projetu CLJ hahú tinan 2016 to’o 2019 hamutuk 211 no profisionál hosi instituisaun Governu hamutuk 57.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here