Diretór Jerál SEFOPE, Paulo Alves. Imajen TATOLI/Francisco Sony.

DILI, 26 jullu 2021(TATOLI)–Diretór Jerál Sekretaria Estadu Formasaun Profisionál Empregu (SEFOPE), Paulo Alves, hateten, tinan oin planeia loke kursu lian koreia ba ema hamutuk 3.000.

“Ita-nia planu, pelumenus ba ema 3.000 sei tuir formasaun lian Koreia, laós iha Dili de’it, maibé atu loke oportunidade mós iha Oé-cusse, nune’e bele fó oportunidade ba sira,” Diretór ne’e informa iha salaun enkontru Hotel Novo Turismo, Lecidere, segunda ne’e.

Tuir Dirijente ne’e, SEFOPE sei loke formasaun fazeadamente iha munisípiu hotu, nune’e ema ne’ebé iha inisiativa bele tuir.

“Ita la’o fazeadamente, bainhira Oé-cusse la’o di’ak maka ita sei loke iha Baucau no Ermera, ida ne’e sai hanesan mehi ba SEFOPE, atu nune’e fó oportunidade ba joven sira atubele kapasita-an,” nia akresenta.

Maski nune’e, nia dehan, inisiativa ne’e bele la’o depende ba orsamentu ne’ebé mai hosi Fundu Dezenvolvimentu Kapitál Umanu (FDCH, sigla portugés) hodi apoia ba programa formasaun no kapasitasaun sira.

“Tetu orsamentu tinan 2022 ne’ebé distribui ba FDCH hamutuk $1.027.800 maibé tanba osan ne’e la to’o, maka ami tau adisionál pur volta $390.000 atu reforsa instituisaun iha área formasaun, nune’e bele reforsa númeru befisiáriu estájiu profisionál,” Diretór Jerál SEFOPE hatutan.

Aleinde ne’e, SEFOPE iha hanoin atu loke sentru formasaun lian Koreia iha Rejiaun Administrativa Espesiál Oé-cusse Ambeno (RAEOA), atu nune’e bele fó oportunidade ba Oé-cusse-oan sira partisipa iha formasaun.

Kursu lian koreia hanesan kritéria ida ba traballadór timor-oan sira molok bá serbisu iha Koreia Súl.

Hafoin tuir kursu, tuir fali teste médiku no rejistu iha sistema baze dadus, no bainhira hetan ona kontratu sei tuir ezame médiku dala-ida tan, ne’ebé kuandu identifika saúde ladún di’ak labele kontinua.

Totál traballadór timor-oan iha Koreia Súl hamutuk 3.000-resin, ne’ebé 705 mak fila mai ona Timor-Leste, ho maioria durasaun serbisu tinan-tolu to’o lima.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here