Ilustrasaun hosi google.

OÉ-CUSSE, 26 jullu 2021 (TATOLI)—Hospitál Referénsia Rejiaun Administrativa Espesiál Oé-Cusse Ambeno (RAEOA) rejista kazu HIV/SIDA hamutuk 23.

Notísia Relevante: Timoroan 1.256 mak sofre HIV/SIDA, mate 140

Adjuntu Diretór Interinu Servisu Saúde Rejionál Oé-Cusse, Fugundo Lafo, hateten abitante na’in-23 iha RAEOA ne’e, daudaun ne’e kontinua halo tratamentu no hetan asisténsia saúde hosi Hospitál Referénsia Oé-Cusse

“Agora daudaun iha Oé-Cusse ita rejista kazu HIV/SIDA 23 ne’ebé mak espalla iha sub-rejionál haat (4) mak Oésilo, Pasabe, Nitibe no Pante Makasar. Pasiente sira-ne’e sei moris no agora kontinua hala’o hela tratamentu no hetan asisténsia hosi servisu saúde iha Hospitál Referénsia Oé-Cusse,” Fugundo Lafo informa ba Ajênsia Tatoli iha nia servisu fatin, Bairru Santa Rosa, Pante Makasar, Oé-Cusse, segunda ne’e

Kazu hirak ne’e detetadu bainhira komunidade sira hala’o tratamentu iha Hospitál Referénsia RAEOA no sentru saúde sira, no fatin konseling voluntáriu sira-ne’ebé mak komunidade hetan ona sensibilizasaun.

Bainhira pasiente sira-nee’e sente iha sintomá, nia dehan, sira ba aprezenta-an iha fasilidade saúde hodi koko sira-nia raan liuhosi teste laboratóriu no balun deteta liuhosi inan isin-rua sira.

“Ita deteta moras sira-ne’e mak rejista tuir dadus ne’ebé mak iha no deteta katak kazu sira-ne’e maioria importadu mai hosi rai-li’ur mai hosi populasaun, estudante, traballadór ne’ebé mak vizita iha nasaun seluk depois infetadu nomós bele lori mai iha rai laran, Ne’e tuir rezultadu intervista ho pasiente sira,” nia dehan.

Nune’e, nia dehan, solusaun ne’ebé autoridade saúde esforsu atu redús kazu ne’e mak servisu saúde rejionál kontinua nafatin halo detesaun ba kazu sira-ne’e mak importa hosi rai-li’ur, ne’ebé afeta ona iha rai laran.

“Ita nafatin kontinua halo sensibilizasaun no promosaun iha fatin barak ba komunidade sira atu hadook-an hosi moras infesaun sira liu-liu moras HIV/SIDA,” nia dehan.

Entretantu tuir dirijente servisu saúde ne’e hateten dezde 2013 iha RAEOA rejista ema-ne’ebé moras infetadu HIV-AIDS hamutuk 33, no dadús mate hamutuk na’in 10 ona no agora sei moris ne’e hamutuk 23.

Jornalista : Abilio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here