Komandante Polisia Unidade Tranzitu, Inspetór Asistente, Yosep Bobo.Imajen/Tatoli, Abilio Elo Nini

OÉ-CUSSE, 25 jullu 2021 (TATOLI)-Polisia Tranzitu, husi Rejiaun Administrativa Espesiál Oé-Cusse Ambeno (RAOEA) hatama ona reseita ba kofre Estadu hamutuk $1.180 husi atividade auto-stop ka pasarevista ba dokumentu transporte públiku no privada.

POLTRAZ RAEOA prende motor tanba viola sinais tranzitu no laiha dokumentu.Imajen/Tatoli,Abilio Elo Nini.

Komandante Polisia Unidade Tranzitu, Inspetór Asistente, Yosep Bobo, relata husi atividade auto-stop ne’ebé hala’o komesa husi fulan-janeiru to’o meadu jullu 2021 konsege prende motor ho karreta hamutuk 50-resin tanba komete infrasaun hanesan laiha karta kondusaun, dokumentu mate ona, la uza kapasete no seluk tan.

“Hahú husi fulan-janeiro to’o jullu, ami konsege prende motor 26 no kareta lima hamutuk 31 ho nia taxa hatama ba kofre Estadu hamutuk $1.180,” nia hateten ba TATOLI, iha Bairru Santa Rosa, Pante Makasar, segunda ne’e.

Maibé, nia klarifika husi totál transporte 50-resin ne’e,  transporte 31 maka konsege selu ona multa ba kofre estadu. Enkuantu transporte 20-resin seidauk selu multa no daudaun para hela iha kuartel  PNTL RAEOA.

“Transporte 21 daudaun ne’e ami hein hela hosi na’in sira nune’e bele koopera ho parte tranzitu tanba komete infrasaun entaun sei hetan sansaun selu multa iha banku maka foin bele lori bá uma, karik lakoi koopera transporte hirak sei kontinua para hodi hein prezensa hosi na’in sira atu kumpre,” nia dehan.

Inspetór Asistente, Yosep Bobo, apela ba komunidade sira atu respeita sinais tranzitu, uza kapasete, renova dokumentu hanesan karta kondusaun no seluk tan.

Jornalista:Abílio Elo Nini

Editor:Agapito dos Santos

HAKEREK NO HATÁN

Please enter your comment!
Please enter your name here