Diretór Jerál Dezevolvimentu Rurál Ministériu Administrasaun Estatál (MAE), Rosito Guterres. Imajen Tatoli/Francisco Sony.

DILI, 26 jullu 2021 (TATOLI)—Diretór Jerál Dezenvolvimentu Rurál Ministériu Administrasaun Estatál (MAE), Rosito Guterres, informa konstrusaun ‘Uma Kbiit Laek’ ba benefisiáriu sira iha munisípiu 12 oras ne’e la’o daudaun.

Notísia Relevante: Governu hahú ona konstrui “Uma Kbiit Laek” 1.254 iha territóriu nasionál

“Prosesu ba konstrusaun ‘Uma Kbiit Laek’ ba ita-nia nia benefisiáriu hamutuk 1.254 iha munisípiu 12, la inklui Rejiaun Administrativa Espesiál Oé-cusse Ambeno (RAEOA) atinje ona 25%,” Rosito Guterres informa ba Agéncia TATOLI, iha nia knaar fatin, Colmera, Dili, segunda ne’e.

Uma Kbiit-Laek. Imajen/Espesiál

Diretór ne’e hatutan, globalmente munisípiu balun la’o lais no balun la’o neineik tanba benefisiáriu balun hela distánsia dook hosi estrada inklui pandemia COVID-19 no kalamidade públiku, entaun RAEOA foin mak iha prosesu sensibilizasaun no identifikasaun ba benefisiáriu sira.

Hosi tabulasaun rekapitulasaun enjineiru sira halo no globalmente progressu ba suku iha munisípiu balun hanesan Munisípiu Dili, Postu Administrativu Metinaro nian, Covalima, Manufahi no Liquiça ne’ebé mak bele dehan katak atinje ona 50% tanba hein taka zinku de’it.

“Ami-nia espetativa, parese iha fulan-agostu nia-laran bele finaliza ona tanba maiória konstrusaun Uma Kbiit Laek ne’e tama ona ba uma nia fíziku,” nia dehan.

Antes ne’e Governu liuhosi Ministériu Administrasaun Estatál (MAE) aloka osan ba konstrusaun Uma Kbiit Laek iha territóriu Timor-Leste hamutuk millaun $25.

Notísia Relevante: Marsu 2021, Governu hahú konstrui uma 1.272 ba kbiit laek

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here