Reuniaun Konsellu FDCH hodi analiza tetu fiskál 2020 no proposta liña ministeriál, iha Hotel Novo Turismo, Lecidere, segunda (26/07). Imajen TATOLI/Egas Cristóvão

DILI, 26 jullu 2021 (TATOLI)–Konsellu Fundu Dezenvolvimentu Kapitál Umanu (FDCH, sigla portugés), ne’ebé lidera hosi Ministériu Ensinu Superiór Siénsia no Kultura (MESSK) konvoka reuniaun hodi hahú diskute tetu orsamentu alokadu hamutuk millaun $10 no analiza proposta hosi liña ministeriál.

“Ita halo analiza proposta hosi liña ministeriál hotu, ne’ebé ita analiza orsamentu ne’e ladún sufisiente, tanba iha Timor-Leste ita tau prioridade ba ema nu’udar fatór sentrál ba dezenvolvimentu no rikusoin país, entaun orasamentu ne’ebé ita tau ba fundu kapitál umanu ne’e ladún sufisiente,” Ministru Ensinu Superiór Siénsia no Kultura, Longuinhos dos Santos, iha Hotel Novo Turismo, Lecidere, segunda ne’e.

Reuniaun konsellu ne’e akontese kada tinan no reuniaun ne’e ba daruak ona, ne’ebé reuniaun dahuluk realiza iha setembru 2020, atu haree tetu fiskál ba FDCH no adisionál balun.

Tanba ne’e, iha proposta adisionál balun ne’ebé konsellu ne’e haree, nune’e ikus mai bele defende iha reuniaun Komisaun Revizaun Orsamentu Polítika (KROP).

“Tetu fiskál hosi Ministériu Finansa hamutuk millaun $10, maibé ita iha adisionál pur volta millaun $9,4, nune’e totál hamutuk millaun $19,4, ne’ebé sei lori ba reuniaun KROP, ne’ebé prevee ba programa profisionál, formasaun téknika, no bolsa estudu ba tinan 2022,” Ministru akresenta.

Iha fatin hanesan, Diretór Jerál Sekretaria Estadu Formasaun Profisionál no Empregu (SEFOPE), Paulo Alves, hateten, instituisaun Estadu ne’e sai ona benefisiáriu hosi fundu ne’e desde tinan 2011 to’o agora.

“Programa sira mak kursu lian koreia, ne’ebé benefisiáriu sira konsege ba serbisu iha koreia no orsamentu ne’e rasik  fó  apoiu ba sentru formasaun hamutuk 12, ne’ebé hanesan sentru formasaun akreditadu hosi SEFOPE no apoia ba programa estájiu nasionál,” nia dehan.

Tinan ne’e, ho osan hosi FDCH, SEFOPE planu fó oportunidade ba joven hamutuk 12.000 hodi asesu ba programa estájiu profisionál maibé la konsege tanba hasoru situasaun pandemia.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here