Koordenadór GASC, Filipe da Costa. Imajen TATOLI/Egas Cristóvão

DILI, 26 jullu 2021 (TATOLI)–Gabinete Apoia Sosiedade Sivil (GASC, sigla portugés) sei koopera ho Oxford Committee for Famine Relief (OXFAM) hodi mellora di’ak liután asuntu sosiedade sivil iha futuru.

Tanba ne’e, Koordenadór GASC, Filipe da Costa hala’o sorumutu ho Diretór OXFAM, Fausto Belo Ximenes, ho nia ekipa hodi fahe informasaun kona-ba serbisu parte rua.

Iha enkontru ne’e, Koordenadór GASC hato’o pilár estratéjiku sira kona-ba haforsa instituisaun, reforsa papél no movimentu sosiedade haksolok ne’ebé nu’udar matadalan hodi kontribui ba programa Governu no mós atinje objetivu Estadu.

“GASC prontu atu serbisu hamutuk ho OXFAM hodi mellora di’ak liután asuntu sosiedade sivíl nian iha futuru,” Koordenadór ne’e relata liuhosi nota imprensa ne’ebé Agência TATOLI asesu, segunda ne’e.

Iha biban hanesan, Diretór OXFAM iha Timor-Leste, Fausto Belo Ximenes, hateten organizasaun ne’e foku ba área tolu hanesan ekonomia, jurídiku klimátika no jurídiku jéneru, ne’ebé to’o agora serbisu hamtuk ona ho sosiedade sivil 17 iha Timor-Leste.

“Ami sei loke sentru rekursu no advokasia hodi apoiu sosiedade sivil ba formasaun iha área rekursu umanu, jestaun projetu, finansa, no seluk tan,” nia akresenta.

Oxfam in Timor-Leste mós sei envolve sosiedade sivíl sira iha sentru ne’e atu halo peskiza kona-ba asuntu hanesan klimátika, jéneru, ekonomia, no seluk tan, ne’ebé sira sei halo advokasia di’ak ba Governu bazeia ba evidénsia hodi rezolve problema nasionál.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here