Diretór Servisu Edukasaun munisipál Baucau, Augusto Hornai Ximenes. Imajen TATOLI/Natalino Belo

BAUCAU, 26 jullu 2021 (TATOLI)–Diretór Servisu Edukasaun munisipál Baucau, Augusto Hornai Ximenes, husu profesór sira uza atu partisipa másimu iha kampaña vasinasaun.

“Natureza vasina maski la’ós obrigatóriu, maibé ami apela ba sira hanesan manorin ne’ebé konsidera halo atendimentu ba públiku, tenki vasina, esetu iha duni kondisaun saúde ladún favorável no labele simu vasina,” Diretor Servisu Edukasaun hateten ba Agência TATOLI, iha ninia knaar fatin, Villa nova, segunda ne’e.

Nia refere ba diploma ministeriál númeru 38/2021, fó sai kritéria ida ba profesor sira iha eskola hotu, bainhira reativa aula prezensiál, pelumenus profesór 70% tenke simu ona vasina.

Notísia relevante: Reativa aula prezensiál, MESSK husu dosente no estudante kompleta vasina

Nune’e, nu’udar responsável edukasaun iha rejiaun ne’e, nia parte fó ona orientasaun ba profesór sira, ne’ebé daudaun pur volta 2200-resin, kompostu hosi permanente, kontratatu hosi Estadu no fundasaun atu partisipa kampaña vasinasaun.

“Iha loron 08 jullu, Baucau nia rekapitulasaun foin mak 52% mak vasina, maibé to’o ohin loron iha ona progesu, tanba ne’e ami apela ona iha loron 02 agostu, ami bele hetan ona relatóriu ikus taxa partisipasaun ita-nia manorin sira iha munisípiu Baucau,” nia akresenta.

Daudaun ne’e, iha totál profesór 162 mak kompleta ona vasina doze daruak vasina tipu AstraZeneca, tanba antes ne’e hola parte iha vasinasaun doze dahuluk ba liña frente sira iha munisípiu Baucau.

Notísia relevante: Abitante 10.449 simu ona vasina AstraZeneca iha Baucau

Enkuantu, faze daruak vasinasaun ba komorbidade no idozu, foin profesór sira hola parte barak, maski balun iha difikuldade tanba iha área remota no vasina la to’o.

“Maioria mak hein atu vasina, ami mós halo kooperasaun ho servisu saúde munisipál, kuandu vasina distribui mai barak ona, entaun ami husu pesoál saúde atu diretamente ba atende iha eskola sira ne’ebé iha númeru profesór barak,” nis subliña.

Tuir dadus, hosi totál númeru eskola hahú hosi pre-eskolár to’o ensinu sekundáriu no tékniku vokasionál hamutuk 243, kompostu hosi pre-eskolar 30, ensinu báziku sekundáriu hamutuk 185, ensinu sekundáriu jerál 23 no tékniku vokasionál hamutuk lima.

Enkuantu, totál estudante hahú hosi ensinu pre-eskolar to’o ensinu sekundáriu no tékniku vokasionál iha Baucau hamutuk estudante 41.255 no profesór 2.200-resin.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here