Formandu CANXIGO Training Center. Imajen/Doc. CANXIGO.

DILI, 26 jullu 2021 (TATOLI)—Diretór CANXIGO Training Center, Zacarias Augusto Freitas, informa Governu liuhosi Ministériu Edukasaun Juventude no Desportu (MEJD) fó sai sirkulár hodi  reativa aula prezensiál iha eskola sira, nune’e sentru ne’e mós hahú ona reativa atividade formasaun ba formandu sira.

Diretór CANXIGO Training Center, Zacarias Augusto Freitas. Imajen/Espesiál.

“Iha semana kotuk, ami hahu ona rejistrasaun ba formasaun mensál nomós ba kursu semenál nian. Tanba ne’e, ohin (segunda 26/7), ami bele hahú ona formasaun ba etapa ida-ne’e,” Zacarias Augusto Freitas hateten ba Agência Tatoli iha nia knaar fatin, Balide, Díli, ohin.

Nia informa, atividade formasaun ba tinan 2021, hahú iha fulanjaneiru maibé to’o iha fulan-marsu suspende tiha tanbá desizaun Governu ne’ebé implementa serka sanitária no konfinamentu obrigatóriu.

Totál formandu ne’ebé tuir formasaun iha tinan 2021 hamutuk na’in1.200 ne’ebé tuir formasaun iha área inglés, portugés, administrasaun finansa, jornalizmu, SPSS Básic Training, Data Base Training, Technical Writing Training, Job Program, Myob Accounting, Public Speaking, no Lideransa.

“Área formasaun hirak ne’e, durante ne’e la’o hela iha tinan 2021 ne’e, depois ho situasaun COVID19, ita paradu tiha,” nia dehan.

Sentru Formasaun Canxigo (Cannox), estabelese iha 12 fulan outubru tinan 2018. Durante harii sentru formasaun refere, fundu ne’ebé hetan mai hosi fundadór sira-ne’ebé suporta iha parte materiál, inklui fundu hodi estabelese sentru refere to’o ohin loron.

Objetivu estabelese formasaun ne’e, atu kapasita joven sira hodi aumenta koñesimentu ka abilidade ho kompotente hodi prepara rekursu humanus ba futuru.

Diretór CANXIGo Training Center ne’e haktuir, antes ne’e sentru refere estabelese ho naran CANNOX Training Center maibé to’o iha 2019 transforma an ba CANXIGO Training Center tanba bainhira ba rejista iha SERVE, naran ida CANNOX ne’e barak tebes iha internet entaun elimina tiha.

Durante ezistênsia, sentru refere fó ona formasaun iha parte mensál nian no hafoin ida-ne’e estabelese fila-fali programa balun konabá kursu semanál nian ho área formasaun administrasaun finansa, multimédia, mayob, excel (Data Base), Públik Speaking, no Lideransa.

Estabelese sentru formasaun refere, atu kapasita joven sira liu-liu joventude sira-ne’ebé hala’o hela estudu iha Ensinu Sekundária, Universidade, inklui funsionáriu sira-ne’ebé hakarak kapasita sirania aan iha área ne’ebé relevante ho sirania servisu.

Totál formandu ne’ebé tuir formasaun iha sentru refere, formasaun ba mensál no semanál, hamutuk 3.897, no hosi númeru ne’e kompostu hosi estudante, juventude en jerál, inklui funsionáriu.

Nia informa, hosi númeru ne’e formandu balun hetan ona servisu iha instituisaun Governu no balun iha instituisaun privada.

“Númeru ba servisu nian, dadaun ne’e ami seida’uk iha dadus maibé ami iha hanoin atu buka dadus sira-ne’e. Maibé ba formandu sira-ne’ebé hetan ona servisu iha. Hanesan agora balun servisu iha sentru CANXIGO, balun iha midia Lafaek News no balun iha Agência TATOLI,” nia hateten.

Formandu CANXIGO Training Center. Imajen/Doc. CANXIGO.

Entretantu, área formasaun ba semanál hanesan Office Administrasaun, SPSS Basic Training, Myob Accounting Training, Microsof Office, DataBase Training, Google Mail, Technical Writing Training, Job Program Desgin Training, Excel Training, BoQ Training, Public Speaking Training, Leadership Training, multimedia, Autocad 2D training, Autocad 3D training, no Téknika Informátika (IT).

Enkuantu, área formasaun iha parte mensál nian hanesan Administrasaun Finansas, Multimédia, Jornalizmu, Inglés, Portugés, Komputadór, no Informátika.

Totál funsionáriu iha sentru refere hamutuk na’in-13 no hosi númeru ne’e funsionáriu na’in-tolu no formadór hamutuk na’in 10. Enkuantu formadór sira hosi profisionál jornalista, administrasaun finansa, inglés, portugés, IT no Multimédia.

Formasaun ba área jornalizmu nia no multimedia, CANXIGO Training Centre fasilita formandu sira hodi hala’o prátika hakerek notísia no halo edisaun ba video iha laboratóriu komputadór ne’ebé kompleta ho fasilidade komputadór.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here