Kondisaun estrada rurál iha Baucau. Imajen TATOLI/Natalino Belo

BAUCAU, 26 jullu 2021 (TATOLI)—Administradór postu admistrativu Baucau villa, Francisco Ximenes, hateten, asembleia postu admistrativu sei konvoka enkontru atu deside área estrada urbana ne’ebé nesesitadu atu halo manutensaun bazeia ba programa mão de obra postu no matadalan.

“Orsamentu manutensaun, mantein ba área ne’ebé defísil ba ita hotu atu asesu no difikulta movimentu, liuliu hosi Villa nova dirasaun bá Dili, ida-ne’e mak ami haree maibé sei depende ba xefe suku nia desizaun iha enkontru asembleia postu administrativu,” Administradór postu informa ba Agência TATOLI, iha ninia knaar fatin, villa antiga, segunda ne’e.

Aleinde ne’e, nia parte hamutuk ho Prezidente Autoridade munisípiu Baucau inklui Diretór Servisu Obra Públika Munisípiu, halo koordenasaun servisu hodi identifika estrada urbana ne’ebé importante atu halo manutensaun.

Área estrada atu manutensaun mak parte rotunda Villa nova to’o nagardjo, dirasaun ba Dili ne’ebé konsideradu nu’udar portaun entrada ba sidade Baucau maibé difikulta tebes atu halo movimentu.

Tanba ne’e, daudaun ne’e iha hanoin bazeia ba programa mão de obra postu liuhosi matadalan faze dahuluk kona-ba estrada sei hala’o iha área urbana hanesan villa ka sidade maibé desizaun tomak sei liuhosi enkontru asembleia postu.

“Ami la halo reabilitasaun ka konstrusaun, maibé halo manutensaun de’it atu maluk seluk no Baucau oan tomak ne’ebé tama iha Baucau bele halo viajen ho susesu no asegura vida,” nia akresenta.

Tuir Francisco, estrada urbana ho kondisaun a’at ona di’ak liu manutensaun hodi hein Governu sentrál liuhosi Ministériu Obra Públika (MOP) nia programa reabilitasaun ou konstrusaun bazeia ba kompeténsia.

Kona-ba orsamentu manutensaun estrada urbana, Admistrasaun postu Baucau villa prevee pur volta $10.000 resin, ne’ebé sei labele kobre Baucau villa tomak, maibé área ne’ebé mak prioridade liu atu fasilita ba ema hotu nia sirkulasaun.

Antes ne’e, Diretór Obra Públika Baucau, Pedro Alexandre Guterres Pereira, koordena ona ho administradór postu Baucau Villa atu aloka osan hosi fundu mão de obra hamutuk $ 15.000 atu aterru (taka) rai mutin ba estrada ne’ebé hetan estragu.

Tuir Dekretu-lei númeru 54/2020, hateten katak estrada urbana sei responsabiliza hosi obra públika nasionál no tuir livru 3 Orsamentu Jerál Estadu (OJE) 2021 ne’ebé aloka ba estrada urbana munisípiu Baucau atu halo reabilotasaun hamutuk kilómetru 23 ho totál orsamentu hamutuk millaun $11.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here