Diretór Ospitál Nasionál Guido Valadares (HNGV sígla portugés), sesante, Aniceto Cardoso Barreto, entrega relatóriu ba Diretór foun, Alito Soares durante serimónia pose iha HNGV, segunda (26/07). Imajen Tatoli/Francisco Sony.

DILI, 26 jullu 2021 (TATOLI)—Médiku Alito Soares hetan konfiansa hosi Ministra Saúde (MS), Odete Maria Freitas Belo, atu lidera hikas Ospitál Nasionál Guido Valadares (HNGV sígla portugés), durante  tinan haat (2021-2024).

Iha diskursu serimónia pose ba diretór foun, Odete Maria Freitas Belo agradese ba diretór sesante Aniceto Barreto ne’ebé konsege halo buat barak durante tinan haat lidera ospitál ne’e.

Notísia relevante: Ekipa médiku HNGV konsulta abitante 70-resin iha Viqueque

“Agradese ba lideransa, jestaun, administrasaun no prestasaun kuidadu saúde hodi lori imajen HNGV nu’udár Ospitál Topu Réferensia ba prestasaun kuidadu saúde nível hotu,” Odete Maria Freitas Belo, agradese.

Governante ne’e rekoñese katak, iha memória institusionál pasadu barak ne’ebé diretór ezekutivu sessante hala’o no husik hela ba HNGV, maski iha dezafiu no limitasaun barak.

Nia husu nafatin ba diretór sesante atu ho esperiénsia nu’udár médiku espesialista pediatria ne’ebé iha, bele ajuda nafatin HNGV liu hosi meiu oioin bazeia ba prinsípiu katak, prontu nafatin atu serbí, tanba kargu mak troka, maibé profisaun nafatin.

Ministra ne’e mós husik-hela  lia-menon ba diretór foun, hahú hosi serimónia pose ne’e nu’udár primeiru homem iha HNGV, hanesan  médiku espesialista sirurjiaun jerál, ne’ebé la’ós buat foun, tanba loro-loron iha hela ambiente Ospitál nian.

“Iha espetativa katak, sei asegura didi’ak nafatin funsionamentu administrativu jerensiamentu no prestasaun kuidadu saúde ho didi’ak, kualidade no dignu,” nia hameno.

Nune’e mós diretór sesante, Aniceto Barreto, espera katak konsellu foun ne’e iha ideia barak liu tán atu dezenvolve di’ak liu tán  HNGV ba oin.

Aniceto Barreto, ninia mandatu termina iha loron 03 fulan abríl 2021, maibé karta notifikasaun foin sai iha 22 jullu.

Alende ne’e, diretór foun Alito Soares konsidera konfiansa ne’ebé nia simu hanesan serbisu ida ne’ebé   motiva tebes ninia responsabilidade morál  atu hadi’a ospitál ne’e hanesan nível tersiáriu no mós  responsável ba sekundáriu.

Iha rezolusaun númeru 36/2015, 23 setembru, Governu rekoñese HNGV nu’udár organizmu ba administrasaun indireta Estadu, ne’ebé konfere ba sira autonomia administrativa, finanseira no patrimonial, hanesan mós Ospitál nasionál referénsia iha territóriu nasionál.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here