Ministru Prezidénsia Konsellu Ministrus, Fidelis Magalhães, hala’o vizita maluk defisiénsia matan ne’ebé halibur an iha Asosiasaun Halibur Defisiénsia Matan Timor-Leste (AHDMTL) iha sira-nia edifísiu Manleuana, Dili, sábadu (24/07). Imajen/Espesiál

DILI, 25 jullu 2021 (TATOLI)– Ministru Prezidénsia Konsellu Ministru, Fidelis Magalhães, sábadu (24/07), fó apoiu foos saka 50 ba Asosiasaun Halibur Defisiénsia Matan Timor-Leste (AHDMTL).

“Ha’u mai tanba hetan kontaktu hosi Diretór Ezekutivu AHDMTL kona-ba informasaun no pedidu balun dehan kontribui uitoan hodi hakmaan difikuldade ne’ebé kolega defisiénsia sira enfrenta iha kontestu atuál,” Ministru  Fidelis Magalhães, hateten hodi responde Agência TATOLI iha AHDMTL, Manleuana, Dili.

Nia dehan, liuhosi kbiit natoon ne’ebé iha bele ajuda  maluk sira-ne’ebé karik presiza duni apoiu. Ho ida-ne’e, Ministru Fidelis, haksolok tebes tanba diretór AHDMTL iha inisiativa hodi halo kontaktu no husu apoiu.

“Ha’u deside no mai iha ne’e hodi fó kontribuisaun uitoan, maibé la’ós hodi Governu nia naran, maibé lori pesoál rasik,” Fidelis Magalhães hateten.

Nu’udar membru Governu, Ministru Fidelis Magalhães informa Konsellu Ministru sempre preokupa ba dezafiu ne’ebé ema ho defisiénsia matan enfrenta no Governu mós ko’alia hela de’it tanba liuhosi programa Ministériu Solidariedade Sosiál no Inkluzaun (MSSI) mós apoiu inklui sosiedade sivíl balun.

Diretór Ezekutivu AHDMTL, Gaspar Soares hateten prezensa Ministru Prezidénsia Konsellu Ministru iha fatin ne’e tanba AHDMTL mak halo kontaktu hodi husu apoiu umanitáriu.

“Ami konvida Ministru Prezidénsia Konsellu Ministru, Fidelis Magalhães ne’e, ami husu ajuda ba nia nu’udar privadu, maibé karik nia mai hanesan ministru entaun ami orgullu liu tan,” Gaspar Soares hateten.

Apoiu ne’e mós sei tau hamutuk hodi distribui mós ba maluk defisiénsia sira iha Suku Umane Ikun ho Umane Ulun iha Postu Administrativu Venilale, Munisípiu Baucau, inklui sei apoiu mós ba maluk sira iha Dili  ho Liquiça.

Jornalista           : Osória Marques

Editór                 : Francisco Simões

HAKEREK NO HATÁN

Please enter your comment!
Please enter your name here